«ءبىرتانوۆ پاندەميانىڭ باسىن بىلىقتىرسا، ال تسوي ۆاكتسيناتسيالاۋ ناۋقانىن كۇيرەتىپ جاتىر» – دەپۋتات

ءماجىلىس دەپۋتاتتارى ەلدەگى كوروناۆيرۋس ۆاكتسيناتسياسىنىڭ باياۋ ءجۇرىپ جاتقانىنا قارسىلىعىن ءبىلدىردى. سارسەنبى كۇنگى پارلامەنت ۇيىندەگى تومەنگى پالاتانىڭ وتىرىسىندا دەپۋتات يرينا ۋنجاكوۆانىڭ پرەمەر-مينيستر اسقار ءماميننىڭ اتىنا جولداعان دەپۋتاتتىق ساۋالىنا وزگە ماجىلىسمەندە دە قوسىلدى.

ونىڭ ايتۋىنشا، حالىق ۆاكتسينانى قالاي جانە قايدان قابىلداۋ كەرەك ەكەنىن بىلمەيدى.

«كەشە دەنساۋلىق ساقتاۋ ءمينيسترى تاعى دا حالىقتى ەكپە سالدىرۋعا  شاقىردى. بىراق ونى كىم قايدا بارىپ، قايدان سالدىرادى دەگەن سۇراق تۋادى. ويتكەنى ايماقتارداعى ەمحانالاردا ۆاكتسينا جوق. بۇل بىلتىرعى جاعدايدى ەسكە سالادى. ءبىر جىل بۇرىن جۇرت پتر تەستىن قايدان جانە قاشان قالاي تاپسىرارىن بىلمەي ابدەن ابىگەرلەنگەن ەدى. قازىرگى جاعداي مينيسترلىكتىڭ نە ءوزىنىڭ، نە الەم تاجىريبەسىنەن ساباق الماعانىن كورسەتىپ وتىر. يزرايل، ۇلىبريتانيا، سلوۆاكيا، سلوۆەنيا، سەربيا، سينگاپۋر جانە باسقا دا بىرقاتار ەلدەردە حالىقتىڭ جارتىسىنان 90%-عا دەيىن ەگىلدى»، – دەدى ۋنجاكو

ۋنجاكوۆا پاندەميا باستالعان بىلتىرعى تولقىندا قاتەلىكتەر قاراجات پەن تاجىريبەنىڭ جوقتىعىنان بولدى، ال بيىل ءبارى جەكىلىكتى دەپ سانايدى. دەپۋتات ەلىمىزدە ەپيدەميولوگيالىق احۋالعا كوڭىلى تولمايتىنىن جەتكىزدى.

«ۆەدومستۆو مالىمەتىنشە، 101 مىڭنان استام ادام ۆاكتسيناتسيالاندى. بۇل ەلدىڭ ءبىر پايىزعا جەتەر-جەتپەسى عانا. ۆاكتسيناتسيا ەكى اي بۇرىن باستالدى. وسىنداي قارقىنمەن جالعاستىرساق، 19 ميلليونعا جۋىق تۇرعىننىڭ 70%-ىن ەگۋگە شامامەن 15 جىل قاجەت بولادى»، – دەدى ول.

ساراپشىلار ەلدە ەكپە ناۋقانى باياۋ ءجۇرىپ جاتقانىن ايتادى. قازىر ەلدە كوروناۆيرۋس جۇقتىرعاندار سانى كۇرت ءوسىپ، بەس بىردەي وبلىس جانە ەل تۇتاس «قىزىل ايماققا» كىردى.

«الدىڭعى مينيستر ءبىرتانوۆ پاندەميامەن كۇرەستىڭ باستالۋىن ساتسىزدىككە ۇشىراتقان بولسا، بۇگىنگى مينيستر تسوي حالىقتى ۆاكتسيناتسيالاۋ ناۋقانىن «ءساتتى» كۇيرەتۋدە. قازىرگى ءمينيستردىڭ كۇندەلىكتى اقپاراتى جاقسارتا المايدى، ال حالىق ەكپە الماق تۇگىلى قايدان جانە قاشان ۆاتسيناتسيالاۋعا بولاتىنىن بىلمەيدى» دەگەن ول ۇكىمەتتەن جالپىحالىقتىق ۆاكتسيناتسيالاۋدى دەرەۋ جۇيەلەۋدى تالاپ ەتتى.

قازاقستاندا 131 170 ادام كوروناۆيرۋسقا قارسى رەسەيلىك ەكپەنىڭ العاشقى دوزاسىن سالدىرعان. ونىڭ 32 482 ادامى ەكى دوزاسىن تولىق العان.

سەيسەنبى كۇنگى بريفينگتە مينيستر تسوي ايماقتارا 150 مىڭ دوزا جەتكىزىلىپ جاتقانىن ايتقان. بۇدان باسقا، ۇكىمەت ساۋىردە رەسەيدەن قوسىمشا 2,5 ملن دوزا ۆاكتسينا جەتكىزۋدى جوسپارلعان كورىنەدى. تسوي «ۆاكتسينانىڭ بۇل كولەمى ۆاكتسيناتسيالاناتىن كونتينگەنت پەن ەرىكتلەرگە ەكپەنى بارىنشا قولجەتىمد ەتەدى، ءساۋىر ايىندا بۇعان ۆاكتسينا سالدىرۋعا نيەتتى ازاماتتاردىڭ دا قولى جەتەتىن بولادى» دەگەن. ونىڭ سوزىنشە، قوعامدىق ورىنداردا جىلجىمالى ەگۋ پۋنكتتەرى ۇيىمداستىرىلماق.

اشىق دەرەككوزدەگى سوڭعى (30 ناۋرىزداعى – QT) اقپاراتقا قاراعاندا، يزرايل حالقىنىڭ 51,5%-ى، ءباا ەلدەرىندە 22%، اقش-تا 16%، باحرەيندە 14% ادام، ال قازاقستان ازاماتتارىنىڭ نەبارى 0,2% شاماسىندا ۆاكتسيناتسيالانعان. ءمينيستردىڭ پىكىرىنشە، ەكپە ناۋقانىنىڭ باياۋ جۇرۋىنە قارجىلىق ەمەس، دايىن ءونىمنىڭ بولماۋى سەبەپ.

“The Qazaq Times”