ەردوعان بايدەنمەن اقىلداساتىن ماسەلەلەردىڭ بار ەكەنىن ايتتى

تۇركيا پرەزيدەنتى رەجەپ تايىپ ەردوعان بايدەنمەن تۇركيا-اقش قاتىناسىن قايتالاي اقىلداساتىنىن ايتتى. مۇنداي مالىمدەمەنى تۇرىك پرەزيدەنتى ازەربايجان ساپارى قارساڭىندا جاساعان.

ازەربايجان ساپارى باستالار الدىندا پرەزيدەنت ەردوعان اقش-تاعى پرەزيدەنت سايلاۋىندا دەموكراتتاردىڭ جەڭىمپازى جو بايدەن تۋرالى پىكىر بىلدىرگەن. ونىڭ ايتۋىنشا بايدەن وعان بەيتانىس ادام ەمەس، وباما تۇسىنان بەرى بىرنەشە رەت كەزدەسىپ، ەكى ەلدىڭ قارىم-قاتىناسىن دامىتۋ تۋرالى كەڭەسكەن.

پرەزيدەنت ەردوعان مالىمدەمەسىندە جو بايدەن تۇسىندا تۇركيا-اقش قاتىناسى جاڭا باعىتتا دامۋى مۇمكىن ەكەنىن بىلدىرگەن. «تۇركيا ناتو-نىڭ بەس ءىرى مۇشەسىنىڭ ءبىرى، ۇيىمداعى ورنىمىزدى وزدەرى دە مويىندايدى. وكىنىشكە وراي، اقش ءبىزدىڭ قارۋ-جاراق ساتىپ الۋ بويىنشا دەربەس ارەكەتتەرىمىزدى سىناپ كەلەدى. بۇل بىزگە ۇنامايدى. اسىرەسە، اقش-تىڭ ءسۇريانىڭ سولتۇستىگى مەن ەفرات وزەنىنىڭ شىعىسىنداعى ارەكەتتەرى مەن ۇستانىمدارى دۇرىس ەمەس»، – دەگەن پرەزيدەنت ەردوعان.

ول سونداي-اق: «بايدەن الدىمەن پرەزيدەنت مىندەتىن قابىلداپ السىن، سوسىن ءبىز ونىمەن وتىرىپ كەيبىر ماسەلەلەر تۋراسىندا سويلەسەتىن بولامىز»، – دەگەن. ەردوعان بۇل مالىمدەمەلەرى ارقىلى قۇراما شتاتتارمەن كەيبىر ماسەلەلەر بويىنشا ديالوگقا مۇددەلى ەكەنىن اڭعارتتى.

“The Qazaq Times”