Түркия президенті Режеп Тайып Ердоған Байденмен Түркия-АҚШ қатынасын қайталай ақылдасатынын айтты. Мұндай мәлімдемені түрік президенті Әзербайжан сапары қарсаңында жасаған.

Әзербайжан сапары басталар алдында президент Ердоған АҚШ-тағы президент сайлауында демократтардың жеңімпазы Жо Байден туралы пікір білдірген. Оның айтуынша Байден оған бейтаныс адам емес, Обама тұсынан бері бірнеше рет кездесіп, екі елдің қарым-қатынасын дамыту туралы кеңескен.

Президент Ердоған мәлімдемесінде Жо Байден тұсында Түркия-АҚШ қатынасы жаңа бағытта дамуы мүмкін екенін білдірген. «Түркия НАТО-ның бес ірі мүшесінің бірі, ұйымдағы орнымызды өздері де мойындайды. Өкінішке орай, АҚШ біздің қару-жарақ сатып алу бойынша дербес әрекеттерімізді сынап келеді. Бұл бізге ұнамайды. Әсіресе, АҚШ-тың Сүрияның солтүстігі мен Ефрат өзенінің шығысындағы әрекеттері мен ұстанымдары дұрыс емес», – деген президент Ердоған.

Ол сондай-ақ: «Байден алдымен президент міндетін қабылдап алсын, сосын біз онымен отырып кейбір мәселелер турасында сөйлесетін боламыз», – деген. Ердоған бұл мәлімдемелері арқылы Құрама Штаттармен кейбір мәселелер бойынша диалогқа мүдделі екенін аңғартты.

“The Qazaq Times”