امەريكا مەن كانادا ماماندارى كوروناۆيرۋستى ساۋلەلى تەراپيامەن ەمدەۋدى ۇسىندى. بۇل تۋرالى Reuters اگەنتتىگى حابارلادى.

زەرتتەۋشىلەردىڭ پىكىرىنشە، ساۋلەلى تەراپيانى قولدانۋ كوروناۆيرۋستان بولاتىن ءولىم جاعدايلارىن 20%-عا دەيىن تومەندەتۋى مۇمكىن. ال تومەن دوزادا رادياتسيانى قولدانۋ اۋرۋدىڭ توكسيكولوگيالىق اسەرلەرىن جويادى.

اتالعان ءادىس ۆيرۋس جۇقتىرعان ون پاتسيەنتكە قولدانىلىپ، سىناقتان وتكەن. تاجىريبەلىك ەمدەۋدەن كەيىن ناۋقاستار ءۇش كۇندە جازىلىپ شىققان. ادەتتە، كوروناۆيرۋستان كەم دەگەندە 12 كۇندە ساۋىعادى. زەرتتەۋ اۆتورلارى ساۋلەلى تەراپيانىڭ كەرى اسەرى بولماعانىن حابارلادى.

الەمدە COVID-19 كوروناۆيرۋسىن 20,7 ميلليون ادام جۇقتىرعان. قايتىس بولعاندار سانى 750 مىڭنان استى. 13 ميلليونعا جۋىق ادام جازىلدى. وشاعى قىتايدىڭ حۋبەي پروۆينتسياسىنان تاراعان بۇل ۆيرۋستى دۇنيەجۇزىلىك دەنساۋلىق ساقتاۋ ۇيىمى «پاندەميا» دەپ جاريالاعان.

"The Qazaq Times"