"رۋزۆەلت" ۇشاق تاسىمالداۋشى كەمەسى قىتايعا جاقىن تۇر. فوتو: م

جەكسەنبىدە حالىقارالىق ىقپالدى اقپارات اگەنتتىكتەرى اقش-تىڭ ۇشاق تاسىمالداۋشى ءۇش بىردەي الىپ كەمەسى مەن ونىڭ شابۋىلشى جانە جويعىش كەمەلەر قوسىنىنىڭ ءۇندى-تىنىق مۇحيتىندا ءجۇزىپ جۇرگەنىن جارىسا جازدى. اقش-تىڭ جوعارى سوعىس قۋاتىنا يە بۇنداي كەمەلەر قوسىنىنىڭ قىتايعا جاقىن تەڭىز سۋلارىنا ءبىر ۋاقىتتا جينالۋى تىم سيرەك بولادى.

ساراپشىلاردىڭ ايتۋىنشا، اقش-قىتاي شيەلەنىسى كەزىندە بۇل قادام قىتايعا اسكەري ەسكەرتۋ قاتارىندا قابىلدانادى جانە اقش تەڭىز كۇشتەرىنىڭ ەپيدەميانىڭ زارداپتارىنا قارسى تۇرا العانىن بىلدىرەدى. اقش-تىڭ كۇشتى اسكەري ەسكەرتۋى اقش-قىتاي قاتىناسى بىرنەشە فاكتورلارعا بايلانىستى شيەلەنىسىپ جاتقان تۇستا جاسالىپ وتىر. بۇل تۋرالى كوپشىلىككە بەلگىلى، قىسقاشا ايتقاندا كوروناۆيرۋسقا بايلانىستى داۋ مەن گونكونگ ماسەلەسى.

ەكى ماسەلە بويىنشا دا بەيجىڭ مەن ۋاشينگتوننىڭ كوزقاراسى قايشى. بەيجىڭ تارابى كوروناۆيرۋس ەميدەمياسىنىڭ تارالۋىنا قاتىستى حالىقارالىق تەكسەرىستەن باس تارتتى. ال، گونكونگ ءىسىن قىتايدىڭ ەگەمەندىك ىشىندەگى ماسەلەسى، وعان اقش-تىڭ ارالاسۋ قۇقىعى جوق دەپ مالىمدەگەن.

Associated Press اگەنتتىگى اقش-تىڭ وزگە دە ونداعان كەمەسى اتالعان ايماقتا جۇرگەنىن حابارلاردى. قۇراما شتاتتاردىڭ ايماقتاعى اسكەري قولباسشىلارىنىڭ مالىمەتىنشە، بۇل ايماقتىڭ تۇراقتىلىعى مەن ونداعى وداقتاستارىنا دەگەن اقش تارابىنىڭ جاۋاپكەرشىلىگىن كورسەتەدى.

«اسسوشيەيتەد پرەسسكە» بەرگەن سۇحباتىندا اقش ءۇندى-تىنىق مۇحيتى قولباسشىلىعىنىڭ وپەراتسيالار جونىندەگى ديرەكتورى گەنەرال-مايور ستيۆەن كيەلەر اسكەري كۇشتى ايگىلەۋ – بۇل كەزەكتى ارەكەتتىڭ ءبىر بولىگى عانا ەكەنىن، اقش-تىڭ ۇشاق تاسىمالداۋشى كەمەلەرى مەن ونىڭ سوققى بەرۋ توبىنىڭ جيناقتالۋى كۇشتى سوعىس قۋاتىن دا ايگىلەيتىنىن ەسكەرتتى.

“The Qazaq Times”