كەشە، اقپاننىڭ 11-ءى، ەلدى ەلەڭدەتكەن قورداي قاقتىعىسىنان كەيىن ءتورتىنشى كۇنى ەكس-پرەزيدەنت نازارباەۆ قازاق-دۇنگەن جانجالى تۋرالى پىكىر ءبىلدىردى.

اپتا باسىندا بىرقاتار اۋىس-ءتۇيىس جاساعان اۋىسپايتىن توراعا قاۋىپسىزدىك كەڭەسىنىڭ جيىنىندا:

– قازىرگى جاعداي مەنى قاتتى الاڭداتىپ وتىر. 30 جىلدىڭ ىشىندە حالقىمىزبەن بىرگە ءبىرتالاي قيىندىقتاردى باستان وتكەردىك. قازىرگى جاستار سول اۋىرتپالىقتاردى ەلەستەتە دە المايدى. قازاقستاندا 130 كاسىپورىن جابىلىپ، 2,5 ميلليون ادام جۇمىسسىز قالدى. ۇيلەردە جىلۋ جوق، ازىق-تۇلىك تاپشىلىعى تۋىندادى. ءبىز وسى سىناقتاردىڭ بارىنەن بىرگە وتتىك، - دەدى.

نازارباەۆ "كوپۇلتتى حالقىمىزدى بىرىكتىرىپ، تۇراقتىلىقتى قامتاماسىز ەتە الماساق، بۇگىندە ەلىمىزگە شەتەلدىك ينۆەستيتسيا كەلمەي، ەكونوميكا تۇرالاپ قالۋشى ەدى" دەپ مالىمدەدى.
ول "قازاقستان حالقى اسسامبلەياسى ەلدەگى مۇنداي جاعدايلاردى الدىن الىپ، باقىلاۋدا ۇستاۋى كەرەك" دەپ سانايدى.
وتكەن جۇما كۇنى كەشكىسىن جامبىل وبلىسى قورداي اۋدانىندا قازاق-دۇنگەن قاقتىعىسى بولىپ، سالدارىنان 10 ادام قازا تاۋىپ، 19 پوليتسەي مەن 40-تان استام تۇرعىن جارالانىپ ەدى.
ساراپشىلار مەن ازاماتتىق بەلسەندىنىڭ كوبى بولعان جاعدايعا "بيلىك كىنالى" ەكەنىن ايتىپ، مۇنىڭ ءتۇبى جىلدار بويى قوردالانىپ، نازار اۋدارىلماعان الەۋمەتتىك تەڭسىزدىك، ۇلتتىق تەڭسىزدىك جانە جەمقورلىق ماسەلەسىمەن بايلانىستىرادى.

“The Qazaq Times”