قىتايدان تىس جەردە قاۋىپتى ۆيرۋستان كوز جۇمعان العاشقى جاعداي تىركەلدى

فيليپپيندە ۋحاننان بارعان 44 جاستاعى قىتايلىق كوروناۆيرۋستان كوز جۇمدى. بۇل ينفەكتسيادان قىتاي شەكاراسىنىڭ سىرتىنداعى العاشقى ادام ءولىمى بولىپ تىركەلدى. دۇنيەجۇزىلىك دەنساۋلىق ساقتاۋ ۇيىمىنىڭ وسىعان قاتىستى مالىمەتىندە كوز جۇمعان قىتاي ازاماتى فيليپپينگە بارۋدان بۇرىن اتالعان ۆيرۋستى جۇقتىرعانىن ايتتى.

فيليپپيندە كوز جۇمعان قىتايلىقتىڭ ۆيرۋستى ۋحان قالاسىنان جۇقتىرعانىن سول ەلدەگى دۇنيەجۇزىلىك دەنساۋلىق ساقتاۋ ۇيىمىنىڭ وكىلى مالىمدەدى. ءارى بۇل قىتايدان تىس جەردە ۆيرۋستان كوز جۇمعان العاشقى ناۋقاس ەكەنىنە نازار اۋدارۋعا شاقىرعان.

سوڭعى رەسمي مالىمەتتەرگە قارايتىن بولساق، ۆيرۋستان كوز جۇمعاندار سانى 300-دەن استى. ونىڭ باسىم كوبى كوروناۆيرۋستىڭ وشاعى بولعان حۋبەي پروۆينتسياسىندا. قىتاي رەسمي تارابى ۆيرۋس جۇقتىرعاندار سانىن ەل بويىنشا 14 مىڭ 380 ادام دەپ كورسەتتى. الايدا، گونكونگ ۋنيۆەرسيتەتىنىڭ مالىمەتى بۇدان الدە قايدا كوپ. اتالعان ۋنيۆەرسيتەتتىڭ مالىمەتى بويىنشا ءبىر عانا ۋحان قالاسىنىڭ وزىندە ۆيرۋسقا شالدىققاندار سانى 75 مىڭ ادامنان اسىپ كەتكەن.

قازىرگە دەيىن قىتايدىڭ ۋحان قالاسىندا بايقالعان قاۋىپتى جاڭا ۆيرۋس تۋرالى بەلگىلى مالىمەتتەرگە قاراعاندا، ۆيرۋس جۇقتىرعاننان كەيىن 1 كۇننەن 14 كۇنگە دەيىن ارالىقتا اۋرۋدىڭ انىق بەلگىسى بايقالمايدى. تەك، 14 كۇننەن كەيىن عانا بەلگىلى بولعانداي دەنە تەمپەراتۋراسى كوتەرىلۋ، تۇشكىرۋ سەكىلدى تىماۋعا ۇقساس بەلگىلەرى بىلىنە باستايدى. ينفەكتسيانىڭ قاۋىپتى بولاتىنى دا سوندىقتان، وسى ارالىقتا ۆيرۋس جۇقتىرعان ادام ادەتتەگىدەي اينالاسىنداعى ادامدارمەن ءتۇرلى قارىم-قاتىناس بارىسىندا ۆيرۋستى تاراتىپ جىبەرۋ قاۋپى كۇشتى.

“The Qazaq Times”