رەسەيگە ارقا سۇيەگەن ەردوعان ەۋروپاعا ازۋ ءتىسىن كورسەتتى

تۇرىك پرەزيدەنتى رەجەپ تايپ ەردوعاننىڭ ەرۋروپا ەلدەرىنە ۇستانعان كوزقاراسىنا جانە گەرمانيا مەن نيدەرلاندىنى ناتسيستىك ارەكەتتەر جاسادى دەپ ايىپتاۋىنا فرانتسيا مەن گەرمانيا باسشىلارى قارسىلىق ءبىلدىردى. ءبىر كۇن بۇرىن "پارس" ءباسپاسوزى، فرانتسيا پرەزيدەنتى فرانسۋا وللاند پەن گەرمانيا كانتسلەرى انگەلا مەركەلتەلەفون ارقىلى سويلەسىپ، ەردوعاننىڭ پىكىرىنە قارسى ورتاق پىكىرگە كەلگەنىن حابارلاعان بولاتىن.  ولار: «تۇرىك پرەزيدەنتى ەردوعاننىڭ گەرمانيا مەن نيدەرلاندىنى ناتسيزممەن سالىستىرۋىن جانە گەرمانيا مەن ەۋرووداقتىڭ باسقا دا مۇشەلەرىنە قارسى سويلەۋىن قابىلداۋعا بولمايدى»، – دەگەن تۇجىرىمعا كەلگەن.

نيدەرلاندى تۇركيا مينيسترلەرىنە ۇگىت-ناسيحات جۇمىستارىن جۇرگىزۋگە رۇقسات بەرمەگەننەن كەيىن، ەردوعان ۇكىمەتى مەن ەۋروپانىڭ قارىم-قاتىناستارى قايشىلىقتارعا ۇلاستى. تۇركيا باسشىلارى ءوز ەلىنىڭ كونستيتۋتسياسىنا وزگەرىستەر ەنگىزۋ رەفەرەندۋمىنا بايلانىستى ۇگىت-ناسيحاتتارىن ەۋروپادا ءومىر سۇرەتىن تۇرىك ازاماتتارىنىڭ اراسىندا جۇرگىزبەك بولعاندا كەيبىر ەۋروپالىق ۇكىمەتتەردىڭ قارسىلىعىنا ۇشىراعان ەدى.

وتكەن جىلى 16 شىلدەدە بولعان «بيلىكتى اسكەري توڭكەرىسپەن تارتىپ الماق بولدى» دەلىنگەن توپتى دەر كەزىندە اۋىزدىقتاعان ەردوعان بيلىگى، وسى ءىستىڭ قىزۋىندا ەل اۋماعىنداعى ءوزىن جاقتامايتىن ءبىراز ازاماتتى تۇتقىنداپ، قۋعىنعا ۇشىراتقان ەدى. بۇل تۋرالى ەۋروپا ەلدەرى تۇرىك بيلىگىن قاتاڭ سىنعا العان بولاتىن. ادامدىق قۇقىقتىڭ تاپتالعانى تۋرالى ورە تۇرەگەلگەن ەۋروپا ەلدەرىنەن بەت بۇرعان ەردوعان، سول كەزدەگى  تۇركيامەن ارادا اسكەري قاقتىعىس تۋىلعالى تۇرعان رەسەيمەن ءتىل بىرىكتىردى. ەو-نىڭ سالعان سانكتسيالارىنان شيرىعىپ وتىرعان رەسەي بيلىگى بىردەن ەردوعاننىڭ جاقتاسىنا اينالعان بولاتىن.

تۇركيانىڭ رەسەيمەن ورتاق پىكىرگە كەلۋى ەۋروايماقتاعى ەلدەردىڭ شامىنا ءتيدى. سوندىقتان، تۇرىك بيلىگىنىڭ رەفەرەندۋمعا بايلانىستى ەۋروپاداعى تۇرىك ازاماتتارىنا جاساماق بولعان ۇگىت-ءناسيحاتىنا جول بەرمەي كەلەدى. الايدا، رەسەي-ناتو اراسىنداعى جانجالدار تولاستاپ، رەسەي مەن ەو اراسى جاقىندار بولسا، رەسەيگە ارقا سۇيەپ كارى قۇرلىققا ازۋ ءتىسىن كورسەتىپ وتىرعان ەردوعان بيلىگى وقشاۋ قالماسىنا كىم كەپىل. وتكەن تاريحتا دا رەسەي بيلىگىنىڭ ءوز مۇددەسى سىنعا تۇسكەندە، وداقتاستارىنا وپالى بولعان ساتتەرى تىم از كەزدەسەدى. ۋاشينگتون بيلىگىندەگى ءداستۇرلى رەسەيگە دەگەن سەنىمسىزدىك تە سونىڭ ايعاعى.

“The Qazaq Times”