كابۋلدا 17 تامىز كۇنى ۇيلەنۋ تويى ءوتىپ جاتقان جەردە جارىلىس بولىپ 63 ادام قازا تاۋىپ، 200-گە جۋىق ادام جاراقات العان.

اۋعانستان ءىىم-ءنىڭ وكىلى ناسرات ءراحيميدىڭ ايتۋىنشا، جارىلىس ۇيلەنۋ تويى كەزىندە ەر ادامدار وتىرعان جەردە بولعان. سونداي-اق، قازا تاپقاندار مەن زارداپ شەككەندەردىڭ اراسىندا بالالار مەن ايەلدەر بار. جالپى تويعا مىڭنان استام ادام قاتىسقان.

"تاليبان" قوزعالىسى بيىلعى جىل باسىنان بەرى كابۋلداعى ەڭ جويقىن شابۋىلعا قاتىسى بارىن جوققا شىعاردى. بۇل جارىلىس ۆاشينگتون اۋعانستانداعى 18 جىلعا جۋىق ۋاقىت جالعاسىپ جاتقان قارۋلى جانجالدى دوعاراتىن بەيبىت بىتىمگە كەلۋ تۋرالى تاليبان وكىلدەرىمەن كەلىسسوز جۇرگىزىپ جاتقان شاقتا جاسالدى.

اۋعانستان پرەزيدەنتى اشراف عاني جەكسەنبى كۇنى Twitter-دەگى پاراقشاسىنا "تاليبان" تەررورشىلارعا "جاعداي تۋعىزىپ" وتىرعانى ءۇشىن جاۋاپكەرشىلىكتەن تايقىپ كەتە المايدى دەپ جازدى.

سونىمەن قاتار، بۇۇ مالىمەتى بويىنشا، بيىلعى جىلدىڭ العاشقى جارتىسىندا ەلدە شابۋىلدار سالدارىنان قازا بولعان نەمەسە جارالانعان ادام سانى 3800-گە جەتكەن.

"The Qazaq Times"