موسۋل تۇرعىندارى ءبىزدىڭ كينودان كورەتىن سوعىس كورىنىسىن كۇندە ومىرىندە كورەدى. فوتو: Business Insider

يراك ۇكىمەت ارمياسىنىڭ گەنەرالدارى جانە موسۋل قالاسىنىڭ تۇرعىندارىنىڭ راستاۋىنشا، يراك ۇكىمەت ارمياسى موسۋلدا بەكىنىپ جاتقان «يسلام مەملەكەتى» لاڭكەستىك ۇيىمىنىڭ ەڭ سوڭعى بايلانىس-تاسىمال جولىن كەسىپ تاستاعان. قازىر موسۋل قالاسى تولىقتاي قورشاۋعا الىندى. قالانى ازات ەتۋ ۋاقىتىنا كەرى ساناۋ قويىلدى. الايدا لاڭكەستىك ۇيىم كۇشتى قارسىلىق كورسەتۋدە. ۇرىس اسا قىزۋ جۇرىلۋدە.

شايقاسقا يراك ارمياسىنىڭ 9-ءشى ديۆيزيونىنا قاراستى اسكەري ءبولىم جۇمىلدىرىلعان. 1 ناۋرىز كۇنى تەلل-افار جولى ارقىلى قالانى تولىق باقىلاۋعا العان. تەلل-افار موسۋلداعى «يسلام مەملەكەتى» ۇيىمىنىڭ ماڭىزدى بەكىنىستەرىنە كىرەدى. سول ارقىلى لاڭكەستىك ۇيىم ماتەريالدىق، كادرلىق تولىقتىرۋ تاسىمالىن جۇرگىزىپ كەلگەن. تەلل-افار موسۋل مەن ءسۇريانىڭ لاككا قالاسىن تۇتاستىراتىن ماڭىزدى قاتىناس ءدالىزى.

يراك ۇكىمەت ارمياسى مەن «يسلام مەملەكەتى» ۇيىمى اراسىنداعى موسۋل شايقاسى سۇراپىل جۇرۋدە. ۇكىمەت ارمياسى قالانىڭ شىعىسىن باسىپ العاننان كەيىن، تيگر وزەنىنەن ءوتىپ، تۇرعىندار ءبىرشاما كوبىرەك قونىستانعان قالانىڭ باتىس بولەگىنە ءوتتى. 28 اقپان كۇنى يراك اقپارات قۇرالدارىنىڭ تاراتقان حابارىندا، ۇكىمەت ارمياسىنىڭ لاڭكەستىككە قارسى ارناۋلى قوسىنى قازىردىڭ وزىندە بۇرىنعى قالالىق ۇكىمەتتىڭ عيماراتىنىڭ ىرگەسىنە كەلىپ تۇر. الايدا، شىعىن دا اۋىر بولعان، جالعاستى العا ىلگەرىلەۋ قيىنعا سوعۋدا.

ەستەرىڭىزگە سالا كەتەيىك، موسۋل بولسا يراكتىڭ سولتۇستىك-باتىسىنداعى نينەۆي پروۆينتسياسىنىڭ ورتالىعى. يراكتاعى ەكىنشى ءىرى قالاسى. 2014 جىلى ماۋسىم ايىنان باستاپ «يسلام مەملەكەتى» تەررورلىق ۇيىمىنىڭ بەكىنىسىنە اينالعان. وتكەن جىلدىڭ قازان ايىنان باستاپ، يراك ۇكىمەت ارمياسى موسۋلدى ازات ەتۋ سوعىسىن باستاعان بولاتىن.

“The Qazaq Times”