الماتى وبلىسىنداعى اسكەري بولىمدە وق اتىلدى

الماتى وبلىسى ۇزىناعاش ەلدى مەكەنىندە ۇلتتىق ۇلان اسكەري قىزمەتشىسى اسكەري بولىمدە باسىنا وق اتتى. بۇل تۋرالى بەلگىلى وتاندىق باق-تا ايتىلدى.

وسىلايشا، تۇپ-تۋرا استانادا مەملەكەت باسشىسى «جاستار جىلىن» قىرۋار قارجىنىڭ قۇدىرەتىمەن اشۋعا نيەت ەتكەندە، ءوزىنىڭ تۋعان وڭىرىندە تاۋەلسىز ەلىن قورعايتىن ءبىر جاس جاۋىنگەر كوز جۇمدى. ارينە، بۇل وقيعانىڭ «جاستار جىلىنىڭ» اشىلۋ سالتاناتىمەن تىكەلەي قاتىسى بولماۋى كەرەك. الايدا، دابىرالى توي الدىندا پرەزيدەنت سەنگەن جاستار ساناتىنداعى جاۋىنگەردىڭ ايدىڭ-كۇننىڭ امانىندا ءدال وسى كۇنى ءوز باسىنا ءوزى اجال قارۋىن توسەپ تۇرىپ مەرت بولۋى تەگىن بولماسا كەرەك-ءتى؟!

ەندى، «ءدال وسى كۇندە» دەپ ايتۋىمىزعا سەبەپ بولعان ناقتى مالىمەتكە جۇگىنەلىك.

"2018 جىلى ماۋسىمدا استانادا قالالىق قورعانىس ىستەرى جونىندەگى دەپارتامەنتى شاقىرتقان قاتارداعى جاۋىنگەر قوجان ۇلاسبەك 2019 جىلى 23 قاڭتاردا شامامەن ساعات 01:35-تە وزىنە بەرىلگەن قارۋدان باسىنا وق اتقان. العان جاراقاتىنان ول قايتىس بولدى»، – دەپ مالىمدەدى ۇلتتىق ۇلاننىڭ "وڭتۇستىك" وڭىرلىك قولباسشىلىعىنىڭ باسپاسوز قىزمەتى.

قايتالاپ ايتامىز: «2019 جىلى 23 قاڭتاردا شامامەن ساعات 01:35-تە» دەلىنگەن قىسقا حابارلامادا.

ياعني، استانادا قۋانىش پەن ماداق-ماقتاۋدىڭ شۇرقىراسۋى باستالماي تۇرىپ، الماتى وبلىسىندا ازات ەلدىڭ ۇلانىنىڭ قوعامعا (الدەكىمگە) نارازى ءولىمىنىڭ سەبەپشى داۋىسى – سۋىق قارۋ ءۇنى شىقتى. الدە، تويدىڭ داقپىرتىنىڭ قاتتىلىعىنان، الدە ءدال وسى كۇنى قورعانىس مينيسترلىگىنىڭ «جاستار جىلىنىڭ» اشىلۋىندا جاس ءولىمدى ەستىرتكىسى كەلمەگەنىنەن بە، ايتەۋىر، سۋىق حابار وتاندىق باق-تا دا كەش تارادى.

ايتا كەتەيىك، بۇگىندە الماتى اسكەري تەرگەۋ باسقارماسى ايتىلعان دەرەككە قاتىستى سوتقا دەيىنگى تەرگەۋ شارالارىن بىرىڭعاي رەەسترگە تىركەگەن. ناتيجەسىندە، قازىر قىزمەتتىك تەكسەرۋ تاعايىندالىپ، اتالعان وقيعانىڭ ءمان-جايى انىقتالۋدا.    

"The Qazaq Times"