ناتو رەسەيگە سوڭعى رەت مۇمكىندىك بەردى

ناتو رەسەيگە سوڭعى رەت مۇمكىندىك بەردى.

جەلتوقسان ايىنىڭ 18-ءى كۇنى ناتو باس حاتشىسى يەنس ستولتەنبەرگ Postimees باسىلىمىنا بەرگەن سۇحباتىندا رەسەي مەن اقش اراسىنداعى زىمىران كەلىسىمىنە قاتىستى پىكىر ءبىلدىردى.

«ءبىز رەسەيگە زىمىران كەلىسىمىن ورىنداۋعا 60 كۇن ۋاقىت بەردىك. ەگەر وسى ۋاقىت ارالىعىندا ولار قويىلعان تالاپتاردى ورىنداماسا، اقش كەلىسىمنەن شىعادى. ءبىز بۇل ماسەلەدە بىرىگىپ جاۋاپ بەرەمىز. بىراق ءدال قازىر جاۋاپتىڭ قانداي بولاتىنىن ايتۋ ءالى ەرتە. سەبەبى بۇل وتە كۇردەلى ماسەلە» - دەپ مالىمدەدى ستولتەنبەرگ.

ەستەرىڭىزگە سالايىق، 21 قازان كۇنى اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىنىن مالىمدەگەن. ول اق ءۇي اكىمشىلىگىنىڭ بۇل قادامىن رەسەي تاراپىنىڭ كەلىسىمدى ورىنداماي وتىرۋىمەن تۇسىندىرگەن. كەيىننەن رەسمي ماسكەۋ اقش-تى «زىمىران كەلىسىمىن بۇزۋ ارقىلى بىرتەكتى الەم قۇرماق» - دەپ ايىپتاعان.

"The Qazaq Times"