الماتىدا تاۋەلسىزدىك مونۋمەنتىنە گۇل شوقتارى قويىلدى

بۇگىن، 16 جەلتوقسان تاۋەلسىزدىك كۇنىنە وراي، الماتىداعى رەسپۋبليكا الاڭىندا تاۋەلسىزدىك مونۋمەنتىنە سالتاناتتى گۇل شوقتارىن قويۋ ءراسىمى ءوتتى.

شاراعا الماتى قالاسى اكىمدىگى، 1986 جىلعى جەلتوقسان وقيعاسىنا قاتىسۋشىلار، اۋعان سوعىسىنىڭ ارداگەرلەرى، جاستار ۇيىمدارىنىڭ وكىلدەرى جانە قالا تۇرعىندارى مەن قوناقتارى قاتىستى.

الماتى قالاسىنىڭ اكىمى باۋىرجان بايبەك باستاپ تاۋەلسىزدىك مونۋمەنتىنە گۇل شوقتارىن قويدى. سالتاناتتى شارانى اسكەري وركەستر مۋزىكامەن سۇيەمەلدەدى. دەگەنمەن، جىلداعىداي بيلىك، قالالىق اكىمدىك وكىلدەرى تاۋەلسىزدىكپەن قۇتتىقتاۋ ءسوزىن سويلەمەدى.  الاڭدى قورشاعان قاۋىپسىزدىكتى قورعاۋ قىزمەتكەرلەرى دە از بولعان جوق.

سالتاناتتى شارا كۋرسانتتاردىڭ پارادىمەن ءتامامدالدى. سالتاناتتى شارادان كەيىن جەلتوقسانشىلار، قالا تۇرعىندارى جەلتوقسان وقيعاسىنىڭ قۇرباندارىن ەسكە الىپ، قۇران باعىشتادى. ەل مەن جەردىڭ اماندىعىن، تاۋەلسىزدىكتىڭ بايانىن سۇراعان دۇعا-تىلەككە قول جايدى.

16 جەلتوقسان قازاق ەلى ءۇشىن ەڭ قاستەرلى كۇندەردىڭ ءبىرى. 1986 جىلى ءدال وسى كۇنى قازاق رۋحى جاڭعىرىپ، قىزىل يمپەريانىڭ تەمىر تەگەۋرىنىنە قارسى ءوز نارازىلىعىن ءبىلدىرىپ، مىڭداعان قازاق جاستارى جەلتوقسان الاڭىنا جينالعان ەدى. 1991 جىلى قازاق ەلى تاۋەلسىز، ازات ەل بولىپ جاريالانعان بولاتىن.

بۇگىن سونداي-اق، جاڭاوزەن وقيعاسىن دا ەسكە الۋ كۇنى. تاۋەلسىز قازاق ەلىنىڭ تاريحىندا العاش رەت بيلىك ءوز حالقىنا وق اتىپ، سالدارىنان 16 ادام قازا تاۋىپ، 100-گە جۋىق ادام زارداپ شەككەن بولاتىن.

“The Qazaq Times” پورتالى، تاۋەلسىز قازاق ەلىن، بارشا قازاقتى تاۋەلسىزدىك تاڭى اتقان ەڭ قاستەرلى مەرەكەسىمەن تاعى ءبىر مارتە قۇتتىقتايمىز! تاۋەلسىزدىك، تەڭدىك، ەركىندىك ءۇشىن ءشاھيت كەشكەن بوزداقتارىمىزدىڭ رۋحىنا ىزەت-قۇرمەت بىلدىرەمىز!

“The Qazaq Times”