ءۇش بىردەي انيماتسيالىق جوبانىڭ تۇساۋى كەسىلدى. فوتو: QT.

كەشە الماتىداعى Esentai Mall ساۋدا ورتالىعىندا «balapan» تەلەارناسى قازاق انيماتسياسى تاريحىنداعى تۇڭعىش رەت تول قاھارماندارعا ارنالعان انيماتسيالاق جوبالارىنىڭ تۇساۋىن كەستى. «ايدار»، «دالا ويىندارى»، «ەرتەمىر» قاتارلى 3D فورماتتاعى انيماتسيالىق جوبالاردىڭ العاشقى سەريالارى كورسەتىلدى.

«balapan» تەلەارناسىنىڭ ديرەكتورى ماقپال جۇماباي ءتول سۋپەر قاھارمانداردى تاقىرىپ ەتكەن انيماتسيالىق جوبالاردى تاۋەلسىزدىك مەرەكەسىنە وراي ۇسىنىپ وتىرعاندارىن اتاپ ءوتتى. سونداي-اق، كورسەتىلىم الدىندا جوبانى جۇزەگە اسىرعان شىعارماشىلىق توپتاردى تانىستىردى جانە العىسىن ايتتى.

جوبانى جۇزەگە اسىرعان ۇجىم. فوتو: «balapan».

تۇساۋكەسەردەن اتالعان ءۇش جوبانىڭ دا بالالارعا ۇلتتىق قۇندىلىقتاردى، ادامگەرشىلىكتى، باتىلدىق پەن وتانسۇيگىشتىكتى ناسيحاتتاۋدى ماقسات ەتكەندەرى انىق بايقالدى. اسىرەسە، انيماتسيالىق فيلمدەردىڭ كەيىپكەرلەرى، وبرازى، ەسىمدەرى قازاقستاندىق بالدىرعانداردىڭ كوزىنە ءۇيىر، قۇلاعىنا تانىس بولاتىنى انىق.

كورەرمەن نازارىنا ۇسىنىلعان ءۇش جوبانىڭ دا وزىندىك ەرەكشەلىكتەرى بولدى. ايتالىق، «ايدار» انيماتسيالىق مۋلتحيكاياسى كونە تۇرىك ميف كەيىپكەرلەرى مەن سيۋجەتتەرىنە نەگىزدەلگەن. قازىرگى زامان بالالار ساناسىندا ەرتە زامانعى جانە ءتول ميفتىك تانىمدار تامىرىنا دەگەن تالپىنىس تۋدىراتىنى بايقالادى. جوبانىڭ پروديۋسەرى ءارى قويۋشى رەجيسسەرلەرىنىڭ ءبىرى ءانناس باعدات بالالار قيالىن الىسقا جەتەلەۋگە تىرىسقانى جوبانىڭ ءون-بويىنان جانە ساۋندترەگ سوزىنەن دە بايقالادى.

«دالا ويىندارى» بولسا بولاشاق ءومىر تۋرالى بالالار قيالىن ۇشتايدى. تەحنولوگيالار عاسىرىنىڭ سمارتفون، كومپيۋتەرلەرىنە بايلانعان جەتكىنشەكتەرىن دالا ويىندارىنا دەگەن قىزىعۋشىلىقتى وياتۋعا تىرىسقان. «ەرتەمىر» بولسا، قازىرگى زامان بالالارىنىڭ سۋپەر قاھارماندار تۋرالى قيالىنا ۇلتتىق ۇلگى ۇسىنادى. بەس قارۋىن اسىنعان ەرتەمىر باتىر ءوزى تۇرعان استانا قالاسىن جات پلانەتالىق جاۋلاۋشىدان قورعاۋ ءۇشىن كۇرەسەدى.

بۇل جوبالاردىڭ 4 جاستان 12 جاستاعى بالالارعا ارنالعانىن ەسكەرگەن ءجون. سونداي-اق، انيماتسيالىق فيلمدەر تۋرالى ايتىلعاندا جۇرتشىلىقتىڭ امەريكالىق انيماتسيالىق فيلمدەرىمەن سالىستىرۋعا قۇمار ەكەنى شىن. الايدا، قازاق انيماتسياسىنىڭ قاز-قاز باسقان قادامى العاشقى ادىمدا ءوز مىندەتىن ورىنداپ جاتقانىن، ءارى بۇل جوبالار قازاق انيماتسياسىنىڭ تاريحىندا ايتارلىقتاي جاڭالىق بولىپ كەلگەنىن ايتار ەدىك.

 “The Qazaq Times”