مايكل پەنس: اقش قىتايمەن قىرعي-قاباق سوعىسقا دايىن

امەريكا قىتايمەن قىرعي-قاباق سوعىسقا دايىن – دەپ مالىمدەدى اقش ۆيتسە-پرەزيدەنتى مايكل پەنس.

قاراشا ايىنىڭ 13-ءى كۇنى «The Washington Post» باسىلىمىنا سۇحبات بەرگەن مايكل پەنس اقش پەن قىتاي قارىم-قاتىناسىنا قاتىستى مالىمدەمە جاسادى.

«اقش پرەزيدەنتى دونالد ترامپ رەسمي بەيجىڭمەن جاقسى قارام-قاتىناس ورناتۋعا دايىن. بىراق ول ءۇشىن قىتاي ءوزىنىڭ ەكونوميكالىق جانە اسكەري ساياساتىن وزگەرتۋى ءتيىس. بۇنىڭ بارلىعى ارگەنتيناداعى كەزدەسۋدە شەشىلەدى. بۇل قىتايدىڭ قىرعي-قاباق سوعىستى توقتاتاتىن سوڭعى مۇمكىندىگى» - دەدى پەنس.

بۇدان بولەك ۆيتسە-پرەزيدەنت ءجۋرناليستىڭ «ەگەر قىتاي قويىلعان تالاپتاردى ورىندامايتىن بولسا، ۋاشينگتون قىرعي-قاباق سوعىس ستسەناريىنە دايىن با؟» - دەگەن سۇراعىنا: «امال قانشا، بولار ءىس بولار. ءبىز قازىر بۇل ماسەلەدە ءوزىمىزدى كۇشتى پوزيتسيادامىز دەپ ەسەپتەيمىز» -دەپ جاۋاپ بەرگەن.

"The Qazaq Times"