ءسۇريا مەن يراك. فوتو: Al Jazeera.

يراكتىڭ سىرتقى ىستەر ءمينيسترى ءال-جافاري سۇريالىق ارىپتەسى ۆاليد ءال-مۋالليمەن ەكى ەلدىڭ اراسىنداعى كەدەندىك باقىلاۋ جۇمىسىن جالعاستىرۋ جونىندەگى تاقىرىپتا بىرقاتار ماسەلەلەردى تالقىلادى. بۇل تۋرالى تۇركيانىڭ «انادولى» اگەنتتىگىنىڭ رەسمي سايتى حابارلادى.

سىرتقى ىستەر مينيسترلىگىنىڭ حابارلاۋىنشا، قوس ەل وكىلدەرىنىڭ اراسىنداعى ديپلوماتيالىق كەزدەسۋ داماسك قالاسىندا وتكەن. اتالعان جيىن بارىسىندا مينيسترلەر شەگارالىق ايماقتارداعى تاۋار اينالىمىن قالپىنا كەلتىرىپ، قوس مەملەكەتتىڭ تۇرعىندارىنا ەركىن قاتىناۋ مۇمكىندىگىن قاراستىرۋ توڭىرەگىندە ءسوز قوزعاعان. ازىرگە، يراك-ءسۇريا اراسىنداعى كەدەندىك بەكەتتەردىڭ  ناقتى قاي ۋاقىتتان باستاپ  اشىلاتىنى بەلگىسىز. الايدا، بۇل سوعىستان ەكونوميكاسى كۇيرەگەن ەكى ەل ءۇشىن دە پايدالى بولاتىنى انىق.

يراك جانە ءسۇريا اراسىنداعى «رابيا»، «ءال-كايم» جانە «ءال-ۆاليد» قاتارلى كەدەندىك باقىلاۋ ورىندارىن قامتىعان شەكارا 600 شاقىرىمدى قۇرايدى.

“The Qazaq Times”