فوتو: El Pais

ۋكراينا رەسەيلىك «رجد لوگيستيكا»، «پرومكومپلەكسپلاست»، «گازگولدەر» جانە تاعى باسقا كاسىپورىندارعا سانكتسيا سالدى. بۇل تۋرالى ۋقق (ۋكراينا قاۋىپسىزدىك قىزمەتى) ءباسپاسوز-قىزمەتىنە سىلتەمە جاساپ «ajanshaber.com» حابارلادى.

رەسەيلىك كاسىورىندار قارا تىزىمگە ءوزىن-ءوزى جاريا ەتكەن دونەتسك جانە لۋگانسك حالىقتىق رەسپۋبليكالارىنىڭ ترانسپورتتىق كومپانيالارىمەن سەرىكتەستىك جاساعاندارى ءۇشىن ىلىككەن. ۋقق مالىمەتىنشە، 2018 جىلى رەسەيلىك كاسىپورىندار وسى ەلدەگى ترانسپورتتىق كاسىپورىندارمەن بىرلەسىپ «سىرتقى ەكونوميكالىق كەلىسىمشارتتارعا» قول قويعان. «رەسەيلىك كاسىپورىندار وسىنداي ارەكەتتەرى ارقىلى حالىقارالىق ەرەجەلەر مەن قاعيدالاردى بۇزىپ وتىر. ءارى، دونەتسك جانە لۋگانسك وبلىستارىنداعى ۋاقىتشا قاداعالاۋسىز ايماقتارداعى تەررورلىق ۇيىمدارعا قارجىلىق كومەك كورسەتەدى. بۇل — ۋكراينا ەكونوميكاسىنا ايتارلىقتاي زالال اكەلەدى. سوندىقتان، ۋقق ساۋدا جانە ەكونوميكالىق دامۋ مينيسترلىگى مەن ۇلتتىق قاۋىپسىزدىك كەڭەسىنە وسى كاسىپورىندارعا قارسى سانكتسيالار ەنگىزۋگە ۇسىنىس جاسادى»، - دەلىنگەن ۋقق ءباسپاسوز قىزمەتىنىڭ مالىمدەمەسىندە. ۋكراينانىڭ وسى قادامىنا قاتىستى كرەمل دە ءوز جاۋابىن بەردى. رف ءباسپاسوز حاتشىسى دميتري پەسكوۆ ماسكەۋ ۋكراينا تاراپىنان ەنگىزىلگەن سانكتسيالارعا قارسى جاۋاپ بەرۋگە ءازىر دايىن ەمەس ەكەنىن مالىمدەدى. «ازىرگە قانداي دا ءبىر قارسى شارا (ۋكرايناعا قارسى) دايىندالمادى»، - دەگەن ول.

“The Qazaq Times”