ۋكراينادا ورىس تىلىنە تىيىم سالىندى

ۋكراينانىڭ لۆوۆ قالاسىندا ورىسشا ءان ايتۋعا، تىڭداۋعا جانە ورىسشا تەلەباعدارلاما كورۋگە تىيىم سالىندى. ۋكراينا قوعام بەلسەندىلەرى «رەسەي تاراپىنان كورسەتىلەتىن قىسىم توقتاتىلمايىنشا» جالعاسا بەرەتىنى ايتىلعان بۇل تىيىمداردى ەندى ۋكراينانىڭ وزگە دە ايماقتارىندا جۇزەگە اسىرۋدى العا تارتۋدا. بۇل تۋرالى pravda.com.ua حابارلادى.

لۆوۆ قالاسىنىنڭ باسشىلىعى «ورىسشا مادەني ونىمدەرىنىڭ» پايدانالماۋىنا قاتىستى شەشىمگە قول قويعان. رەسەيدىڭ ۋكراينا باسقىنشىلىعىنا نۇكتە قويىلعانعا دەيىن جالعاساتىنى ايتىلعان شەشىمدە لۆوۆقا قاراستى قالالار مەن ەلدىمەكەندەردە، اسىرەسە حالىق كوپ جينالعان ورىنداردا ورىسشا ءان ايتۋعا، تىڭداۋعا، سونىمەن قاتار، رەسەيلىك تەلەباعدارلامالاردى كورۋگە قاتاڭ تىيىم سالىنعان. كەيبىر ينتەرنەت سايتتارى «ورىس مادەنيەت ونىمدەرىنىڭ» وسى ايماقتا كەڭىنەن تارالعانىن، ورىسشا كىتاپتاردىڭ كوپ ەكەنىن، ايتۋلى ءىس-شارالاردىڭ ورىسشا وتەتىنىن جازىپ، مۇنداي تىيىمنان قانداي دا ءبىر ناتيجەگە قول جەتكىزۋ مۇمكىن ەمەس دەپ جازادى. اتالعان زاڭ بۇزىلعان جاعدايدا قانداي جازا قولدانىلاتىنى اشىپ ايتىلماعانمەن، ورىسشا كورسەتىلىمدەر مەن اندەرگە ورىن بەرگەن قانداي دا ءبىر كاسىپورىنداردىڭ ليتسەنزيالارى تارتىپ الىناتىنى، قوعامدىق ورىنداردا ورىسشا سويلەگەن ادامدارعا قارسى سوتتىق ءىس اشىلاتىنى ەسكەرتىلدى. ايتا كەتۋ كەرەك، وسىعان دەيىن ۋكراينا ورىسشا ءبىلىم بەرۋگە تىيىم العان ەدى.

"The Qazaq Times"