فوتو: eadaily.com

جەكسەنبى، 1 قىركۇيەك كۇنى ليۆيا استاناسى تريپوليدەگى تۇرمەدە ورىن العان تارتىپسىزدىكتەن كەيىن  جازاسىن وتەۋشى 400 ادام تۇرمەدەن قاشىپ كەتكەن، - دەپ حابارلايدى eadaily.com ليۆيانىڭ قۇقىق قورعاۋ ورگاندارىنا سىلتەمە جاساپ.

پوليتسيانىڭ مالىمەتىنشە، تۇرمە باقىلاۋشىلارى ءوز ومىرلەرىنە قاۋىپ تونگەندىكتەن قاماۋداعىلار شىعارعان بۇلىككە بوگەت جاساي الماعان. بۇل بۇلىك تۇرمەگە جاقىن ماڭدا بەلگىلى ءبىر قارۋلى توپتار اراسىندا قاقتىعىس بولاپ جاتقانىن تۇرمەدەگىلەر بىلگەننەن كەيىن باستالعان. ايتا كەتۋ كەرەك، تۇرمەدەگىلەردىڭ كوپشىلىگى كادىمگى قىلمىستىق ىستەر بويىنشا سوتتالعاندار  نەمەسە ەلدىڭ 2011 جىلى ورنىنان الىنعان بۇرىنعى باسشىسى مۋاممار كاددافيگە قولداۋ كورسەتكەندەرى ءۇشىن ءىستى بولعاندار. بۇدان بۇرىن تريپوليدەگى ليۆيا ۇلتتىق كەلىسىم ۇكىمەتى توقتاۋسىز قاقتىعىستاردىڭ كەسىرىنەن ەل استاناسى مەن ونىڭ توڭىرەگىندە توتەنشە جاعداي جاريالاعان ەدى.

ءبىر-بىرىنە قارسى كۇرەسۋشى توپتاردىڭ اراسىنداعى قاقتىعىستار ليۆيالىق استانادا 27 تامىزدان بەرى جالعاسۋدا. وندا، ءتىپتى زىمىراندارعا دەيىن قولدانىلۋدا دەپ حابارلايدى جەرگىلىكتى اقپارات كوزدەرى. ليۆيا دەنساۋلىق ساقتاۋ مينيسترلىگىنىڭ سوڭعى حابارلارىنا قاراعاندا، قاقتىعىس سالدارىنان 39 ادام قازا تاپقان. ۆەدوموستۆانىڭ مالىمەتىنشە، قازا تاپقانداردىڭ باسىم كوپشىلىگى بەيبىت تۇرعىندار.  قازىرگى ۋاقىتتا ليۆيالىق استاناداعى جالعىز اۋەجاي ءوز جۇمىسىن توقتاتقان.

بارىمىزگە بەلگىلى، ليۆياداعى ازاماتتىق سوعىس 7 جىلدان بەرى جالعاسۋدا. ول 2011 جىلى ەلدى 40 جىلدان استام ۋاقىت باسقارعان ديكتاتور مۋاممار كاددافي بيلىكتەن كەتىرىلگەننەن كەيىن دەرەۋ باستالعان ەدى.  قازىرگى تاڭدا قارۋلى توپتار ەلدىڭ اۋقىمدى بولىگىن ءوز قولدارىنا العان. سونىمەن قاتار، حالىقارالىق قاۋىمداستىق تاراپىنان تانىلعان ەلدىڭ ۋاقىتشا ۇكىمەتى شەكتەۋلى عانا وكىلەتتىلىككە يە بولىپ وتىر. ەندى، وسى جىلدىڭ 10 جەلتوقسانىندا ليۆيادا پارلامەنتتىك جانە پرەزيدەنتتىك سايلاۋلار وتەدى دەپ كۇتىلۋدە.

“The Qazaq Times”