وسى جىلدىڭ 4-5 قازاندا ۇلان-باتىر قالاسىندا رەسمي ساۋدا-ەكونوميكالىق ميسسيا وتەدى. قازاقستاننىڭ سىرتقى ساۋدا پالاتاسى وتاندىق كاسىپكەرلەردى وسى ساۋدا-ەكونوميكالىق ميسسياعا قاتىسۋعا شاقىرادى. بۇل تۋرالى پالاتانىڭ ءباسپاسوز قىزمەتى حابارلايدى.

قازاق جانە موڭعول كاسىپكەرلەرى اراسىنداعى ساۋدا قاتىناستارىن دامىتۋ، ەكى ەل اراسىندا ىسكەرلىك بايلانىس ورناتۋ ءىس-شارانىڭ باستى ماقساتى.

 ميسسيانىڭ باعدارلاماسىندا: ساۋدا-ەكونوميكالىق فورۋمعا قاتىسۋ، ۇلان-باتىردىڭ مەملەكەتتىك بيلىك ورگاندارىنىڭ وكىلدەرىمەن ىسكەرلىك كەزدەسۋ، موڭعوليانىڭ كاسىپكەرلەرى مەن ۇيىمدارىنىڭ وكىلدەرىمەن ىسكەرلىك بايلانىس جوسپارلانۋدا.

ءىس-شارانى قازاقستاننىڭ سىرتقى ساۋدا پالاتاسى «اتامەكەن» ۇلتتىق كاسىپكەرلەر پالاتاسىمەن، ينۆەستيتسيالار جانە دامۋ مينيسترلىگىمەن، قازاقستان رەسپۋبليكاسىنىڭ موڭعولياداعى ەلشىلىگىمەن جانە موڭعوليانىڭ ۇلتتىق ساۋدا-ونەركاسىپتىك پالاتاسىمەن بىرلەسىپ ۇيىمداستىرادى.

“The Qazaq Times”