ۋاشينگتون سۇرياداعى وپپوزيتسيانى قولداۋدان باس تارتتى

اقش باشار اساد رەجيمى مەن دەرا قالاسىنداعى يراندىق توپتارمەن كۇرەسۋشى وپپوزيتسيانى قولداۋدان باس تارتتى، - دەپ حابارلايدى «eadaily.com» اگەنتتىگى.

اسادتىڭ قارسىلاستارى امەريكالىقتاردىڭ وزدەرىنە اراب تىلىندە حابارلاما جىبەرگەنىن ايتقان. اقش وكىلدەرىنىڭ جولداۋىندا: «ايماقتاعى احۋال امەريكالىق ۇكىمەتكە ءمالىم. اقش رەسەيلىكتەر مەن سۇريالىق رەجيمگە ءسۇريانىڭ وڭتۇستىك-باتىسىندا ەشقانداي اسكەري وپەراتسيا جاساماۋ تۋرالى ەسكەرتتى. اقش-تىڭ اسكەري ارالاسۋىن كۇتپەستەن-اق ءوز وتباسىلارىڭىزدىڭ بولاشاعىن ويلاڭىزدار» ،- دەلىنگەن.

ايتا كەتۋ كەرەك، اقش، ۇلىبريتانيا جانە يوردانيا 2015 جىلدان بەرى ءسۇريانىڭ وڭتۇستىگىندەگى اسكەري وپەراتسياعا قولداۋ كورسەتىپ كەلەدى. 2017 جىلى استانادا جاسالعان كەلىسىمشارتقا سايكەس، دەرا قالاسى سۇرياداعى قاقتىعىس ازايعان ايماق تىزىمىنە ەنگىزىلگەن ەدى. الايدا، ارادان ەكى اي وتپەستەن قالا وسى مارتەبەسىنەن ايىرىلىپ، اقش پەن رەسەي تاراپىنان «قاۋىپسىزدىك ايماعى» بولىپ جاريالانعان بولاتىن. كوپ ۇزاماي، اقش ءسۇريانىڭ وسى ايماعىنداعى وپپوزيتسيا وتريادتارىنا بەرىلەتىن كومەكتى توقتاتقان. ۋاشينگتوننىڭ ەسكەرتۋىنە قاراماستان، اساد رەجيمىنىڭ كۇشتەرى مەن يراندىق توپتار وسىدان ءبىراز ۋاقىت بۇرىن ءسۇريانىڭ بۇكىل اۋماعىن باقىلاۋعا الۋ ماقساتىندا دەرا قالاسىندا اۋقىمدى وپەراتسيا باستاعان ەدى.

“The Qazaq Times”