فوتو: كورنەكى سۋرەت

تۇركيا سوتى  104 اسكەري قىزمەتكەرگە 2016 جىلعى توڭكەرىس ارەكەتىنە قاتىسقاندارى ءۇشىن ءومىر بويىنا تۇرمەگە وتىرۋ جازاسىن بەردى. بۇل تۋرالى بي-بي-سي اگەنتتىگى حابارلايدى.

ودان بولەك، تۇركيانىڭ يزمير قالالىق سوتى 21 ادامدى «پرەزيدەنتتى ولتىرۋگە ارەكەتتەنگەن» قىلمىسى بويىنشا، 20 جىلعا باس بوستاندىقتارىنان ايىرىپ، 31 اسكەري قىزمەتكەرگە «تەررورلىق ۇيىمنىڭ مۇشەسى» دەگەن ايىپپەن جەتى جىلدان 11 جىلعا دەيىن باس بوستاندىعىنان ايىرۋ تۋرالى ۇكىم شىعاردى.

ەسكە سالايىق، 2016 جىلدىڭ 16 شىلدەسىندە تۇركيادا اسكەري توڭكەرىسكە ارەكەت جاسالىپ، ءساتسىز اياقتالعان ەدى. ءساتسىز اسكەري توڭكەرىس ارەكەتىنەن كەيىن 40 مىڭنان استام ادام تۇتقىندالدى. كوتەرىلىس سالدارىنان 161 ادام قازا تاۋىپ، 1440 ادام جاراقات العان بولاتىن.

تۇركيا پرەزيدەنتى رەجەپ تايىپ ەردوعان مەملەكەتتىك توڭكەرىس ارەكەتىنە يسلام ناسيحاتشىسى فەتۋللاھ گۇلەندى ايىپتاعان. ال، كوپتەگەن جىلدان بەرى اقش-تا تۇراتىن گۇلەن وزىنە تاعىلعان بۇل ايىپتاۋلارمەن كەلىسپەيتىنىن مالىمدەگەن ەدى.

 “The Qazaq Times”