سولتۇستىك جانە وڭتۇستىك كورەيا باسشىلارى تاعى دا كەزدەسۋ جاساۋعا كەلىستى

سولتۇستىك جانە وڭتۇستىك كورەيا 16 مامىردا «وتە جوعارى دەڭگەيدە» جاڭا ءبىر كەزدەسۋ وتكىزۋگە شەشىم شىعاردى، دەپ حابارلايدى Dw.com تەلەراديو كومپانياسى وڭتۇستىككورەيالىق رەسمي ورگاندارعا سىلتەمە جاساپ.

كەزدەسۋ ەكى ەلدىڭ شەكاراسى تۇيىسەتىن پحانمۋندجوم شەكارالىق ەلدىمەكەنىندە وتەدى. عيماراتىنىڭ، ءتىپتى ۇستەلىنىڭ دە جارتىسى وڭتۇستىك كورەياعا، جارتىسى سولتۇستىك كورەياعا تيەسىلى اتالعان اۋىلدا 27 ءساۋىر كۇنى ەكى ەل باسشىلارىنىڭ تاريحي كەزدەسۋى وتكەنى بەلگىلى. سوندا سولتۇستىك كورەيا جەتەكشىسىنىڭ 1953 جىلدان بەرى العاش رەت وڭتۇستىك كورەيا جەرىنە تابانى تيگەن ەكەن. كەزدەسۋ سوڭىندا وڭتۇستىك كورەيا پرەزيدەنتى دە ءوزىنىڭ 2018 جىلدىڭ كۇزىندە سولتۇستىكتەگى كورشىسىنە باراتىن ويى بار ەكەنىن ايتتى.

ەندىگى جاڭا كەزدەسۋ بارىسىندا پحەنيان مەن سەۋل دەلەگاتسيالارى بۇدان بۇرىن كەلىسىلگەن كەلىسىمشارتتاردى، اسىرەسە كورەي جارتى ارالىنداعى يادرولىق قارۋسىزداندىرۋ ماسەلەسى تۋرالى كەلىسىمشارتتى ىسكە قوسپاق.

ايتا كەتۋ كەرەك سەۋل مەن پحەنيان ءبىر-بىرىنە جاقىنداسىپ كەلەدى. ماسەلەن، 4 مامىر كۇنى ولار ساعات بەلدەۋىنە قاتىستى ورتاق مامىلەگە كەلىپ، كحدر ۋاقىت ولشەمىن وڭتۇستىك كورەيانىڭ ساعاتىمەن بىردەي ەتكەن ەدى. سونىمەن قاتار، سولتۇستىك كورەيا حالىقارالىق ازاماتتىق اۆياتسيا ۇيىمىنا (ICAO) وڭتۇستىك كورەياعا اۆيامارشرۋت اشۋعا ءوتىنىش جاساعان بولاتىن.

ال، كيم چەن ىن  12 ماۋسىم كۇنى سينگاپۋردە اقش پرەزيدەنتى دونالد ترامپپەن كەزدەسۋگە دايىندالۋدا. ترامپ ءوزىنىڭ «Twitter» جەلىسىندەگى پاراقشاسىندا: «ەكەۋمىز دە وسى كەزدەسۋدىڭ بۇكىل الەم ءۇشىن ەرەكشە ساتكە اينالۋىنا بارىمىزدى سالامىز»، - دەپ جازدى. ءبىر قىزىعى، كيم چەن ىن كحدر باسشىلارىنىڭ تاريحىندا امەريكالىق ليدەرمەن جۇزبە-ءجۇز كەزدەسەتىن العاشقى پرەزيدەنت بولماق.

“The Qazaq Times”