يران جوعارى سوتى «يزرايل تىڭشىسى» ايىبىمەن ءبىر ازاماتىن ولىمگە ۇكىم ەتتى

يران جوعارى سوتى وسىدان ەكى كۇن بۇرىن احمەت رەزا جاللەل اتتى ازاماتىن «يزرايل تىڭشىسى» دەگەن ايىپپەن ءولىم جازاسىنا ۇكىم ەتتى. وعان تاعىلعان ايىپتا «يراننىڭ يادرولىق باعدارلامالارىنا قاتىستى ماڭىزدى قۇپيا مالىمەتتەردى يزرايل بارلاۋ جانە اقپارات ورگانىنا جەتكىزگەن» دەلىنگەن. بۇل تۋرالى «People» باسىلىمى حابارلادى.

يراننىڭ «تەھران تايمس» باسىلىمى تەھراننىڭ (تەگەران) باس پروكۋرورى جافاري دوۋلاتاباريدىڭ سوزىنە سىلتەمە جاساي وتىرىپ، احمەت رەزا جاللەلدىڭ يزرايل اقپارات كوزدەرىنە 8 رەت ماڭىزدى قۇپيالاردى اشقانى تۋرالى حابارلادى. «موسساد» اگەنتتىگىنە يران قورعانىس مينيسترلىگى مەن يران اتوم ەنەرگياسى مەكەمەسىنىڭ نىساندارىنا قاتىستى مالىمەتتەردى جەتكىزگەنى تۋرالى ايتىلادى. احمەت يزرايل جاققا بەرگەن مالىمەتتەرى يران اتوم باعدارلاماسىن جۇزەگە اسىرۋ، مەملەكەت قورعانىس ستراتەگياسى، ماڭىزدى قورعانىس قۇرىلعىلارى، اتوم ەنەرگياسى ۇيىمى مەن قورعانىس مينيسترلىگىنىڭ لاۋازىمدىلارى تۋرالى مالىمەتتەردى قامتىعان.

ير ۇكىمەتىنىڭ رەسمي مالىمەتىنە قاراعاندا، احمەت رەزا جاللەل يزرايل جاقتان اقشا الۋمەن بىرگە ءوزى جانە وتباسى مۇشەلەرىن  شۆەتسيا ازاماتتىعىنا وتكىزگەن. ول وتكەن جىلى ساۋىردە يران جەرىندە تۇتقىندالعان، جاقىندا عانا مەملەكەتتىك ارنادا ءوزىنىڭ ارەكەتىنە وكىنىشىن ءبىلدىرىپ، مالىمدەمە جاساعان.

يراننىڭ رەسمي باسىلىمدارىنىڭ ءبىرى جاريالاعان حاباردا، جاللەل يزرايل جاققا قاتىستى ينفورماتسياسىن جەتكىزىپ بەرگەننەن كەيىن، قورعانىس مينيسترلىگى جانە اتوم ەنەرگياسى ۇيىمىنىڭ ەكى ادامى 2010 جىلى قاستاندىققا ۇشىراعانى تۋرالى جازىلعان.

“The Qazaq Times”