قىتاي قاۋىپسىزدىك كەڭەستە سولتۇستىك كورەيانى قورعاشتادى

ديپلوماتيا قىزمەتكەرلەرى جەتكىزگەن دەرەكتەردىڭ بىرىندە، قىتاي بۇۇ قاۋىپسىزدىك كەڭەسىنە ءوتىنىش جولداپ، اقش جاعىنان سولتۇستىك كورەياعا قارسى سانكتسيالاردى بۇزدى دەپ ايىپتالعان 10 كەمەنى حالىقارالىق سانكتسيا تىزىمىنە ەنگىزۋدى كەيىنگە قالدىرۋدى سۇراعان. بۇل تۋرالى «WSJ» باسىلىمى حابارلادى.

بۇۇ قاۋىپسىزدىك كەڭەسىنىڭ ارنايى كوميسسياسى بەيسەنبى كۇنى اتالعان كەمەلەرگە قاتىستى سانكتسيانى بۇزعانى تۋرالى قورىتىندى شىعارعان بولاتىن. بۇل كەمەلەر حالىقارالىق سانكتسيا تىزىمىنە ەنەتىن بولسا، بۇۇ-عا مۇشە بارلىق ەلدەردىڭ پورتتارىنا كىرۋىنە شەكتەۋ قويىلادى. دەگەنمەن، قىتاي تارابى رەسمي تۇردە وسى شەشىمنىڭ سانكتسيالار ءتىزىمىن زەرتتەۋگە كوبىرەك ۋاقىت جۇمساۋ ءۇشىن 28 جەلتوقسانعا دەيىن كەيىنگە قالدىرۋدى سۇرادى. بۇل قىتايدىڭ قاۋىپسىزدىك كەڭەستىڭ شەشىمىن كەيىنگە قالدىرۋىن ەكىنشى رەت تالاپ ەتۋى.

قازىرگى كورەي تۇبەگى ماسەلەسى جانە اقش پەن قىتاي قارىم-قاتىناسىنان الىپ قاراعاندا بۇل وقيعا سوڭعى سالماقتى سىناقتىڭ ءبىرى. اقش وكىلدەرىنىڭ قاراۋىنشا، بۇۇ انىقتاعان كەمەلەردىڭ ءبىرى قىتاي كومپانياسىنا تيەسىلى كەمە بولۋى مۇمكىن. دەگەنمەن، امەريكالىق لاۋازىمدى تۇلعالاردىڭ ايتۋىنشا، كەمەنىڭ يەسى كاسىپورىنداردىڭ كەشەندى توبى، ياعني بىرلەسكەن كاسىپورىندار كورىنەدى. ال، ودان باسقا ەكى كەمە تايۋانعا (تايۆان) قاراستى كومپانيالاردان.

اقش لاۋازىمدىلارىنىڭ قاۋىپسىزدىك كەڭەسىنىڭ كوميسسياسىنا ۇسىنعان مالىمەتىند، قاراعاندا،  بۇل كەمەلەر سولتۇستىك كورەياعا تازارتىلعان جانارمايلاردى زاڭسىز تاسۋعا كومەكتەسكەن نەمەسە سولتۇستىك كورەياداعى كومىردى رەسەيگە جونەلتكەن. بۇل سولتۇستىك كورەياعا سالىنعان حالىقارالىق سانكتسيانى بۇزۋ بولىپ سانالادى.

قىتاي ۇكىمەت جاعى اتالعان ماسەلە تۋراسىندا جۋرناليستەردىڭ سۇراعىنا جاۋاپ بەرمەي وتىر.

“The Qazaq Times”