پاريجدە جۇرگىزۋشىسىز اۆتوبۋستار سىناقتان ءوتتى

پاريج بيلىگى جۇرگىزۋشىسىز باسقارىلاتىن ەلەكتر موتورلى  ەكى شاعىن اۆتوبۋستى ىسكە قوستى دەپ حابارلايدى BBC-ءدىڭ قىرعىز قىزمەتى.

قازىر بۇل جوبا ەكسپەريمەنت رەتىندە قاراستىرىلىپ وتىر. ەگەر جۇزەگە اسىپ جاتسا، قالا بيلىگى ترانسپورتتىڭ بۇل ءتۇرىن ودان ارى دامىتپاقشى.

ازىرگە ەكى شاعىن اۆتوبۋس تا قىسقا مارشۋتتا قاتىناپ ءجۇر.  ولارعا ارنايى جول جولاق بەرلىلگەن. اۆتوبۋستار 12 ادامعا لايىقتالعان. قاۋىپسىزدىك ءۇشىن قاجەتتى قۇرالدارمەن جابدىقتالىپ، باقىلاۋ كامەرالارى ورناتىلعان.

ءپاريجدىڭ ۆيتسە-مەرى جان-لۋي ميسسيكا بۇل جۇرگىزۋشىسىز اۆتوبۋستار جونىندە الەمدەگى قالالىق ترانسپورتقا رەۆوليۋتسيا جاسايدى جانە ءىرى قالالارداعى قاتىناستى وزگەرتەدى دەپ سەنىم ارتادى.

بولاشاقتا قالا بيلىگى بۇل ترانسپورت، قالا سىرتىنا قاتىنايتىن پويىزداردى الماستىرادى دەپ ۇمىتتەنەدى. ەكسپەريمەنت قورىتىندىسى ءۇش ايدان سوڭ شىعارىلادى.

سوڭعى جىلدارى بىرنەشە اۆتوموبيل كومپانيالارى جۇرگىزۋشىسىز كولىك شىعارۋمەن اينالىسىپ جاتىر. كەيبىر قالالاردا بۇنداي كولىكتەردى كەزىكتىرۋگە بولادى.

2020-جىلعا بۇنداي كولىكتەردى شىعارۋعا بەلسەنگەندەر اراسىندا گەرمانيالىق BMW جانە Volkswagen, امەريكالىق General Motors, Tesla مەن كورەيالىق KIA كومپانيالارى بار.

سونىمەن قوسا ءىرى IT-كومپانيالار، Apple جانە Google دە وسى شاراعا كىرىسىپ جاتىر. ولارمەن بىرگە Uber دە ات سالىسىپ جاتىر.

«The Qazaq Times»