تۇركيا اقش-قا تەررورلىق توپتى قولداۋ جونىندە اشىق نارازىلىق ءبىلدىردى

تۇركيا ۇكىمەتى كوپتەن بەرى يران، يراك، ءسۇريا جانە تۇركيا جەرىندەگى كۇردتەردىڭ تەرريتورياسىن قامتىعان دەربەس كۇردىستان قۇرۋدى ماقسات ەتكەن پكك تەررورلىق توبىن بارىنشا ايىپتاۋمەن كەلەدى. تۇركيا جاق قۇراما شتاتتى پكك-نى قولداپ وتىر دەپ بىرنەشە رەت ايىپتاعان بولاتىن. جاقىندا تۇركيا ۇلتتىق قورعانىس ءمينيسترى بەلگياداعى كەزدەسۋ كەزىندە اقش قورعانىس ءمينيسترى مەتتيسكە پكك قولدانعان اقش-تا وندىرىلگەن قارۋلاردى كورسەتكەن. بۇل تۋرالى سول ەلدىڭ «اناتولى» اقپاراتتىق اگەنتتىگىنىڭ رەسمي سايتى جازدى.

بەلگيانىڭ باس قالاسى بريۋسسەلدە وتكىزىلگەن ناتو مۇشەلەرىنىڭ قورعانىس وكىلدەرى جينالىسىندا تۇركيانىڭ ۇلتتىق قورعانىس مينيسترلىگىنىڭ باسشىسى شەمدينيلدە بولعان تەررورلىق وقيعادان كەيىن قولعا تۇسىرگەن پكك قارۋلارىنىڭ اقش-تا وندىرىلگەنى تۋرالى قۇجاتتاردى اقش قورعانىس ءمينيسترى مەتتيسكە كورسەتكەن.

وسىعان دەيىن ءسۇريا مەن يراكتاعى «يم» كۇشتەرىنە قارسى كۇرەسۋ ءۇشىن اقش جاق وسى ەلدەردەگى كۇردتەردىڭ PYD/YPG ۇيىمىنا قارۋ-جاراقتار بەرگەنى تۋرالى ءمالىم. ال، تۇركيا جاق كۇرد قارۋلى توپتارىنىڭ ءبارىن دە تەررورلىق ۇيىمعا جاتقىزۋدا. بۇل قايشىلىقتان ەكى ەل اراسىندا الاۋىزدىق پايدا بولعالى دا كوپ بولعان.

تۇركيانىڭ قورعانىس وكىلدەرى: «PYD/YPG-گە بەرىلگەن قارۋلاردىڭ، پكك جاساعان تەررورلىق شابۋىلداردا تابىلۋىنان، بۇل قارۋ-جاراق كومەگىنىڭ زاڭدى دەپ ايتۋعا بولمايدى»، – دەدى. تۇركيا جاق بۇل باس قوسۋ كەزىندە تەرروريزمگە قارسى كۇرەستەگى شىعىنداردى دا جاريا ەتتى جانە 11 اي ىشىندە 2300-دەن استام تەرروريستى جويعاندارىن العا تارتتى.

“The Qazaq Times”