ۆەنەسۋەلا سىرتقى قارىزدارىن وتەي الماي وتىر

ۆەنەسۋەلا پرەزيدەنتى نيكولاس مادۋرو مەملەكەت ءوزىنىڭ سىرتقى قارىزدارىن وتەۋگە قابىلەتسىز ەكەندىگىن حابارلادى. مەملەكەتتىك ارنادان سويلەگەن سوزىندە ەل پرەزيدەنتى ينۆەستورلارمەن سىرتقى قارىزدى تولەۋ ۋاقىتىن شەگەرۋ نەمەسە ونىڭ كولەمىن ازايتۋ بويىنشا كەلىسىمدەرگە كەلۋگە تىرىساتىنىن جەتكىزدى. بۇل تۋرالى CNN Money جازدى.

PDVSA مەملەكەتتىك مۇناي كومپانياسى وسى اپتادا ءوز قارىزدارىنىڭ 1,1 ملرد دوللارىن قايتاردى. ۆەنەسۋەلانىڭ ۇلتتىق بانكىندە قالعان قارجى كولەمى 10 ملرد دوللار ەكەنىن ەسكەرسەك، ەكونوميكالىق جانە ساياسي داعدارىستاعى ەل ءۇشىن مۇنىڭ وتە ۇلكەن اقشا ەكەنىن اڭعارۋ قيىن ەمەس.

ۆەنەسۋەلادا سونىمەن قاتار گۋمانيتارلىق داعدارىس تا ءورشىپ تۇر. حالىقتىڭ باسىم بولىگى كۇندەلىكتى ءومىر سۇرۋگە قاجەتتى قاراپايىم زاتتاردى ساتىپ الۋ مۇمكىندىگىنەن ايىرىلعان. ۇلتتىق ۆاليۋتا بوليۆاردىڭ قۇنى اقش پەننيىنىڭ وننان ءبىر بولىگىنە تەڭ دارەجەگە دەيىن ارزانداعان.

ەگەر نيكولاس مادۋرونىڭ ۋولل-ستريت ينۆەستورلارىمەن كەلىسسوزدەرى ءساتسىز اياقتالسا، ەلدى دەفولت كۇتىپ تۇر. قارىز بەرۋشى تاراپتار مەملەكەتتىڭ جالعىز تابىس كوزى بولىپ وتىرعان مۇنايىن باقىلاۋعا الۋدى تالاپ ەتۋى مۇمكىن. مۇنداي جاعدايدا حالىق مۇنايدان تۇسەتىن اقشاعا ساتىپ الىناتىن تاماق پەن ءدارى-دارمەكتەن قاعىلادى. سNN Money تىلشىلەرى ۆەنەسۋەلا ۇكىمەتىنىڭ ءتيىمسىز باسقارۋىنان ەلدى اۋىل شارۋاشىلىق سالاسى تولىقتاي كۇيرەپ، قازىر مەملەكەت بارلىق ازىق-تۇلىك ونىمدەرىنىڭ بارلىق ءتۇرىن يمپورتتايتىن جاعدايعا جەتكەنىن جازادى.

قارىز بەرۋشى ينۆەستورلارمەن كەلىسۋ وڭاي شارۋا ەمەس. ماسەلەن، ارگەنتينا ءوزىنىڭ سىرتقى قارىزدارىن شەشە الماي اقش-تىڭ سوتتارىندا 15 جىل ءجۇردى. وسى ۋاقىت ارالىعىندا حالىقارالىق قارجى نارىقتارىنا كىرۋ قۇقىعىنان ايىرىلعان ارگەنتينانىڭ ەكونوميكاسى قۇلدىرادى. قوس تاراپتىڭ قارىم-قاتىناستارى ارگەنتينانىڭ ۇكىمەتى اۋىسقان 2016 جىلى عانا رەتتەلدى.

“The Qazaq Times”