"تاۋەلسىزدىك جولىنداعى ديپلوماتيا" كىتابىنىڭ تۇساۋ كەسەر ءراسىمى. فوتو اۆتورى: ەرجان جاۋباي

بۇگىن استاناداعى ەۋرازيا ۇلتتىق ۋنيۆەرسيتەتىندە بەلگىلى قوعام قايراتكەرى، ديپلومات سايلاۋ باتىرشا-ۇلىنىڭ 75 جىلدىق مەرەيتويىنا ارنالعان حالىقارالىق عىلىمي-تاجىريبەلىك كونفەرەنتسيا ءوتتى. كونفەرەنتسيانىڭ تاقىرىبى – «قازاقستان رەسپۋبليكاسىنىڭ ديپلوماتياسى: قالىپتاسۋى، دامۋى جانە كەلەشەگى».

جيىننىڭ بەتاشار ءسوزىن باستاپ اشقان ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ مەرەيتوي يەسىن قۇتتىقتاپ، ديپلوماتتىڭ تۇلعالىق جانە كۇرەسكەرلىك جولى جايلى جۇرەكجاردى پىكىرىمەن ءبولىستى. سونداي-اق، ۋنيۆەرسيتەت پروفەسسورى رەتىندە حالىقارالىق قاتىناس ماماندىعىندا وقيتىن ستۋدەنتتەرگە ۇستازدىق ەتىپ جۇرگەن ديپلوماتقا، وقۋ ورنى اتىنان سىي-سياپاتتارىن تابىستادى. جانە دە ديپلوماتتىڭ كەۋدەسىنە ۋنيۆەرسيتەتتىڭ ەكى جىلدا ءبىر تاعايىندايتىن "كۇلتەگىن" توسبەلگىسىن تاقتى.  سونىمەن قاتار، سەنات توراعاسى قاسىم-جومارت توقاەۆتىڭ، سىرتقى ىستەر ءمينيسترى قايرات ءابدىراحمانوۆتىڭ  جانە باسقا دا رەسمي مەكەمە باسشىلارىنىڭ قۇتتىقتاۋلارى وقىلدى.

كونفەرەنتسيا كەزىندە. فوتو اۆتورى: ەرجان جاۋباي

كونفەرەنتسياعا قاتىسۋشىلار قازاقستان ديپلوماتياسىنىڭ ءتۇرلى كەزەڭدەگى قىزمەتىن، مەملەكەتتىڭ قالىپتاسۋى بارىسىنداعى اتقارعان ءرولىن كەڭ كولەمدە اتاپ ءوتتى. كونفەرەنتسياعا مەرەيتوي يەسىن قۇتتىقتاۋ ءۇشىن كوپتەگەن قوناقتار جينالدى.  تاۋەلسىز قازاقستاننىڭ تۇڭعىش سىرتقى ىستەر ءمينيسترى بولعان تولەۋتاي سۇلەيمەنوۆ، ديپلوماتياعا ەڭبەگى سىڭگەن قىزمەتكەر قايىر وماروۆ، اكادەميك جابايقان ءابدىلدين، قازاقتىڭ تۇڭعىش عارىشكەرى، قوعام قايراتكەرى توقتار اۋباكىروۆ، اكادەميك عاريفوللا ەسىم، ەكس دەپۋتات، قوعام قايراتكەرلەرى ورازكۇل اسانعازى، ەراسىل ابىلقاسىم سونداي-اق، عالىم ديحان قامزابەكۇلى، امانگەلدى قاشقىمباەۆ، يۋنەسكو كافەدراسىنىڭ مەڭگەرۋشىسى عادىلبەك شاياحمەتوۆ، تاعى باسقا كوپتەگەن تانىمال تۇلعالار مەن قازاقستانداعى شەتەل ەلشىلىكتەرىنىڭ ديپلوماتتارى قاتىسىپ، عىلىمي باياندامالار مەن قۇتتىقتاۋلارىن جەتكىزدى.

قازاقتىڭ تۇڭعىش عارىشكەرى توقتار اۋباكىروۆ. فوتو اۆتورى: ەرجان جاۋباي

ال، سىرتقى ىستەر مينيسترلىگى تاراپىنان ءمينيستردىڭ ورنىباسارى رومان ۆاسيلەنكو جانە مينيسترلىكتەگى  حالىقارالىق اقپارات كوميتەتى توراعاسىنىڭ ورىنباسارى اسقار ابدراحمانوۆ قۇتتىقتاۋ سوزدەرىن ارنادى.

سونىمەن بىرگە، القالى جيىنعا كەلگەن قاۋىم ديپلوماتتىڭ ءومىرى مەن ديپلوماتيا جولىن، تاۋەلسىزدىك كەزەڭىندەگى كۇرەسكەرلىگىن، قاجىر-قايراتىن ارقاۋ ەتكەن «تاۋەلسىزدىك جولىنداعى ديپلوماتيا» اتتى ەسسە-ديالوگ كىتابىنىڭ تۇساۋكەسەر ءراسىمى ءوتتى. كىتاپتىڭ اۆتورى – جازۋشى-جۋرناليست،  "The Qazaq Times" پورتالىنىڭ شەف رەداكتورى مۇرات الماسبەكۇلى. 7 بولىمنەن تۇراتىن ەڭبەكتە ديپلوماتتىڭ ءومىرى، قىزمەتى سۋرەتتەلە وتىرىپ، قازاق ديپلوماتياسى تاريحى، ديپلوماتيادا جانە تاۋەلسىزدىك جولىندا قىزمەت ەتكەن باسقا دا تۇلعالار ءسوز بولادى. شىعارمادا ۇلت تاعدىرى، ءتىل، ءدىن، شەتتەگى قانداستار جايى دا كەڭىنەن باياندالعان.

كىتاپ كەيىپكەرى سايلاۋ باتىرشا-ۇلى مەن كىتاپ اۆتورى مۇرات الماسبەكۇلى.

ەڭبەكتىڭ شىعۋى – ديپلومات سايلاۋ باتىرشا-ۇلىنىڭ 75 جىلدىق مەرەيتويى مەن ديپلوماتيالىق قىزمەتىنىڭ 50 جىلدىعىنا تۇسپا-تۇس كەلىپ وتىر.

قازاق ديپلوماتياسىندا ابىز اقساقالدىڭ ءبىرى ءارى بىرەگەيى سانالاتىن سايلاۋ باتىرشا-ۇلى ءالى دە ۇلت مۇددەسى ءۇشىن قىزمەت ەتۋدە. ول قازىر سىرتقى ىستەر ءمينيسترىنىڭ شتاتتان تىس كەڭەسشىسى جانە ەۇۋ-دا پروفەسسور.

"The Qazaq Times"