"يم" سودىرلارىنىڭ جاتتىعۋ الاڭى. فوتو: TVC News.

«يسلام مەملەكەتى» دەپ اتالاتىن تەررورلىق توپ يراك پەن ءسۇريا جەرىندەگى تەرروريزمگە قارسى كۇرەستەردەن جەڭىلىس تاۋىپ، ارەكەت ايماقتارى تارىلا باستادى. سوڭعى مالىمەتتەرگە قاراعاندا، اتالعان لاڭكەستىك توپتىڭ 5600-دەن استام ادامى ءوز ەلدەرىنە قايتىپ بارادى. بۇل تۋرالى BBC-ءدىڭ رەسمي سايتى جازدى.

بۇل مالىمەتتى اقش-تىڭ «Soufan Center» دەپ اتالاتىن اناليتيكالىق ورتالىعى تاراتتى. ورتالىقتىڭ مالىمەتىنە قاراعاندا، ەكى جىل ىشىندە 33 مەملەكەتتەن كەلىپ توپقا قوسىلعان لاڭكەستەر ەلىنە قايتىپ جاتىر. اتالعان ورتالىقتىڭ حابارىندا قايتىپ بارعان لاڭكەستىك توپ مۇشەلەرى سول ەلدىڭ قاۋىپسىزدىگىنە قاتەر توندىرەتىنىن ايتقان.

2014 جىلى ماۋسىم ايىندا وزدەرىن «يسلام مەملەكەتى» دەپ اتاعان ەكسترەميستىك توپ «حاليفات» جاريالاعاننان كەيىن، الەمنىڭ جەر-جەرىنەن نەشە مىڭداعان جيھادشىلار توپقا كەلىپ قوسىلعان ەدى.

وتكەن اپتادا اقش-تىڭ قولداۋىمەن ءسۇريا جەرىندەگى «يم» توبىنىڭ نەگىزگى تۇراعى راككا قالاسى قايتارىلىپ الىندى.  «Soufan Center»-نىڭ مالىمەتىنە قاراعاندا شەتەلدەن كەلىپ تەررورلىق توپقا قوسىلعاندار سانى 2015 جىلدىڭ سوڭىنان قازىرگە دەيىن كۇرت ازايىپ كەتكەن. بۇل «يم»-گە قوسىلعان شەتەلدىك جيھادشىلاردىڭ قاۋىرت تۇردە ەلىنە قايتىپ جاتقانىن بىلدىرەدى.

راككا قالاسىنداعى لاڭكەستەردىڭ تۇراعىنان تابىلعان تىزىمدە 40 لاڭكەستىڭ ەسىمى بار بولىپ شىقتى. ولاردىڭ 19 مىڭ ادامى شەتەلدەن كەلگەن بولىپ شىقتى. دەگەنمەن، «يم» توبى جەڭىلىس تاپقان سايىن بۇل ادامداردىڭ قايدا-قالاي كەتكەنى تۋرالى ناقتى مالىمەت جوق. «Soufan Center» 33 مەملەكەتتىڭ مالىمەتتەرىن توپتاستىرا وتىرىپ 5600 ادامنىڭ ءوز ەلىنە قايتقانىن انىقتاپ وتىر. ولاردىڭ اراسىندا 400 ادام رەسەيگە قايتىپ بارعان. ال، رەسەيدەن «يم»-گە بارعان جيھادشىلار سانى 3417 ادام دەپ كورسەتىلگەن. ساۋد ارابياسىنان 3244 جيھادشى سوعىسقا بارىپ، ونىڭ 760 ادامى ەلىنە قايتقان. فرانتسيادان 1910 ادام «يم»-گە قوسىلىپ، 271 ادامى قايتىپ بارعان.

اتالعان ورتالىقتىڭ مالىمەتىندە قازاقستاننان بارعان نەمەسە قايتا ورالعاندار تۋرالى مالىمەت كەزدەسپەدى. دەگەنمەن، كورشىلەس وزبەكستاننىڭ اتى بار. بۇل ەلدەن 1600-گە جۋىق جيھادشى اتتانعان. ولاردىڭ قايتىپ كەلگەندەرى تۋرالى مالىمەت انىق ەمەس.

“The Qazaq Times”