فوتو: AP

يراكتاعى كۇردىستان اۆتونومياسى كيركۋك ايماعىنا مىڭداعان اسكەرلەردى ورنالاستىرىپ جاتىر. ساقاداي-ساي دايىندىقپەن، تولىق قارۋلانعان اسكەرلەر يراك اسكەرىنىڭ مۇنايلى اۋدانداردى تارتىپ  الۋعا شابۋىل جاساۋ قاۋپى تۋىنداي قالسا، تەرريتوريانى قورعاپ قالۋ ماقساتىندا قويىلعان. بۇل تۋرالى ءال-جازيرا اقپاراتتىق اگەنتتىگى جازدى. 

AP اقپاراتتىق قىزمەتىنىڭ حابارلاۋىنشا، كيركۋك ايماعىنداعى اسكەردىڭ جالپى سانى 6 مىڭعا جۋىقتايدى. ماسۋد بارزاني جاۋىنگەرلەرگە: ء"بىزدىڭ تاراپىمىزدان ەشقانداي ەسكالاتسيا بولماۋى كەرەك. ءبىز تەك شابۋىل جاسالعان جاعدايدا عانا ءوزىمىزدى قورعاۋعا ارەكەت ەتەمىز" دەپ بەيبىتشىلىكتى ساقتاۋ ماڭىزدىلىعىن ەسكەرتتى.

وسى تۇستا 25 قىركۇيەكتە تاۋەلسىزدىك ءۇشىن رەفەرەندۋم وتكىزگەن كۇردىستانعا دەگەن ورتالىق ۇكىمەتتىڭ قىسىمى ارتىپ وتىرعانىن اتاپ وتكەن ءجون. باعداد پەن كۇردىستان اراسىندا كيركۋك قالاسى جانە وزگە دە مۇنايلى اۋداندارعا قاتىستى داۋلاردىڭ بار ەكەنىن ەسكەرسەك، قازىر تابيعي بايلىعى باسىم ايماقتى ءار تاراپ ءوز قول استىنا الۋعا مۇددەلى. سوڭعى كەزدەرى يراكتاعى مۇنايدىڭ كوپ بولىگى وڭتۇستىكتە ءوندىرىلىپ جۇرگەنىنە قاراماستان، سولتۇستىكتەگى كيركۋك قورىنىڭ ستراتەگيالىق ماڭىزى زور. كۇردىستان اۆتونومياسى اتالعان قالانى 2014 جىلى "يسلام مەملەكەتى" لاڭكەستىك ۇيىمىنان ازات ەتكەننەن كەيىن قولىنا العان بولاتىن.

“The Qazaq Times”