سولتۇستىك كورەيانىڭ حاكەرلىك شابۋىلدارىنىڭ جەتىستىگى الەمدى الاڭداتىپ وتىر

اقپارات كوزدەرىنىڭ حابارلاۋىنشا، سولتۇستىك كورەيا حاكەرلىك شابۋىلدار ارقىلى وڭتۇستىك كورەيانىڭ اسكەري دەرەكتەرىن ۇرلاۋ ءىسى، ءۇشىنشى ءبىر تاراپتىڭ كيبەرقاۋىپسىزدىك باعدارلامالارىنىڭ ارالاسۋى ارقىلى جۇزەگە اسقان. بۇل تۋرالى «WSJ» باسىلىمى حابارلاعان.

سولتۇستىك كورەيا حاكەرلىك شابۋىل ارقىلى وڭتۇستىك كورەيا مەن اقش بىرلەسكەن قۇپيا اسكەري وپەراتسيالار تۋرالى دەرەكتى ۇرلاۋى وڭتۇستىك كورەيا بيلىگىن تاڭ قالدىردى. سەبەبى، بۇل اسكەري دەرەكتەر عالامتوردان وقشاۋلانعان، تەك قانا اسكەري ىستەرگە پايدالانىلاتىن جەلىدە ساقتالعان. سوندىقتان، مۇنداي جۇيە وزگە ەلدىڭ حاكەرلەرىنەن قاۋىپسىز دەپ تانىلىپ كەلگەن.

وڭتۇستىك كورەيانىڭ بۇل ماسەلەگە جاۋاپتى وكىلدەرىنىڭ ايتۋىنشا، سولتۇستىك كورەيا جابىق اسكەري جەلىگە شابۋىلداۋ ءۇشىن، ەڭ الدىمەن وڭتۇستىك كورەياداعى اسكەري كومپيۋتەرلىك انتيۆيرۋستىق باعدارلامالارمەن قامتاماسىز ەتۋشى Hauri Inc. كورپوراتسياسىنا شابۋىلداپ كىرگەن. بۇل كومپانيا دايىنداعان كيبەرقاۋىپسىزدىك باعدارلامالارىنا ىلەسە وتىرىپ، وڭتۇستىك كورەيانىڭ ماڭىزدى اسكەري دەرەكتەر بازاسىنا كىرە العان. سولتۇستىك كورەيانىڭ كيبەرشابۋىلداعى مۇنداي جەتىستىگى اقش پەن وڭتۇستىك كورەيانى قورقىتىپ تاستادى.

“The Qazaq Times”