فوتو عالامتور بەتتەرىنەن الىندى.

رەسەي پرەزيدەنتى ۆلاديمير ءپۋتيننىڭ تۋعان كۇنىندە وسى اپتادا 20 كۇنگە اباقتىعا جابىلعان وپپوزيتسيا باسشىسى الەكسەي ناۆالنىيدىڭ قولداۋشىلارى قارسىلىق شەرۋىنە شىقتى. ماسكەۋدە مىڭعا جۋىق، ءپۋتيننىڭ تۋعان قالاسى سانكت-پەتەربۋرگتە 3 مىڭ  شاماسىندا شەرۋ قاتىسۋشىلارى كوشەگە شىعىپ، نارازىلىق ءبىلدىردى. قارسىلىق اكتسياسى رەسەيدىڭ وزگە قالالارىندا دا بولعان. بۇل تۋرالى APF اقپاراتتىق اگەنتتىگى جازدى. 

وپپوزيتسيا باسشىسى الەكسەي ناۆالنىي ناۋرىز جانە ماۋسىم ايلارىندا جەمقورلىققا قارسى جالپىحالىقتىق شەرۋلەر ۇيىمداستىرىپ، وعان 10 مىڭعا جۋىق ازامات قاتىسقان بولاتىن. ول كەزدە مىڭداعان رەسەيلىك پوليتسيا قىزمەتكەرلەرىنىڭ قولىنا تۇسكەن ەدى. بۇل جولى مەملەكەت باسشىسىنىڭ تۋعان كۇنىنىڭ شىرقىن بۇزۋعا جول بەرمەۋ ماقساتىندا 124 ادام قۇقىق قورعاۋ قىزمەتكەرلەرىنىڭ قۇرىعىنا ءىلىندى.

ماسكەۋ كوشەلەرىنە جينالعان كوپشىلىك "تۋعان كۇنىڭمەن، پۋتين!", ء"پۋتينسىز رەسەيدى قولدايمىز" دەگەن ۇراندارىمەن ەستە قالدى. مۇندا كەلگەندەردىڭ بارلىعى بىردەي كەلەسى جىلى پرەزيدەنتتىك سايلاۋعا تۇسۋگە ۇمىتكەر الەكسەي ناۆالنىيدىڭ جاقتاستارى دەۋگە كەلمەيدى. ويتكەنى APF اقپاراتتىق اگەنتتىگى تىلشىلەرىمەن سۇحباتتاسقان بىرقاتار رەسەيلىكتەر مۇندا "جۇيەنى وزگەرتۋ، جەمقورلىقتىڭ جويىلۋىن تالاپ ەتۋ ءۇشىن كەلگەندەرىن" ايتقان. ماسەلەن، سانكت-پەتەربۋرگتەگى شەرۋ قاتىسۋشىلارىنىڭ قاتارىنان تابىلعان  20 جاستاعى يگور كليموۆ: "مەن ەسىمدى بىلگەلى مەملەكەتتى پۋتين باسقارىپ كەلەدى. ءبىزدىڭ ەلدىڭ بارلىق سالاسىن جەمقورلىق جايلاعان" دەسە، سۆەتلانا كيسەلەۆا: "مەن الەكسەي ناۆالنىيدىڭ ادال قولداۋشىلارىنان ەمەسپىن. مۇندا مەملەكەت ىشىندەگى ساياسي باسەكە بولۋىن تالاپ ەتۋگە كەلدىم" دەگەن پىكىر بىلدىرگەن. ەلدە وپپوزيتسيا جانە ءبىر عانا بيلىكتەن وزگە دە تاڭداۋلار بولعانىن قالايتىن ورەست چەرچەسوۆ تا الەكسەي ناۆالنىيدىڭ جانكۇيەرى ەمەستىگىن العا تارتادى.

رەسەيدى 1999 جىلدان بەرى باسقارىپ كەلە جاتقان ۆلاديمير پۋتين بيىل 65 جاسقا كەلدى. شەرۋ قاتىسۋشىلارى زەينەت جاسىنداعى پرەزيدەنتتىڭ ءوز ساياسي كارەراسىن وسى جەردەن توقتاتقانىن قالايدى. جۋىردا ۆلاديمير پۋتين كەلەسى جىلى ناۋرىز ايىندا بولاتىن پرەزيدەنت سايلاۋىنا قاتىسۋ تۋرالى ءالى ناقتى شەشىم شىعارماعانىن حابارلاعان ەدى. بىراق ساراپشىلار بەلگىلى ساياساتكەر تاعى دا 6 جىلدىق مەرزىمگە مەملەكەت تىزگىنىن ۇستاۋعا بەل بايلاسا، ونىڭ سايلاۋدا ءسوزسىز جەڭىپ شىعاتىنىن ايتادى.

الەكسەي ناۆالنىي جەمقورلىققا قارسى كۇرەس كامپانيالارىنىڭ بەلدى مۇشەسى، جوعارى ءبىلىمدى زاڭگەر. ول رەسەيدىڭ قازىرگى بيلىگىنىڭ قاتەلىكتەرى مەن ەكونوميكالىق، الەۋمەتتىك ماسەلەلەردى قوزعايتىن بىرنەشە كولەمدى قارسىلىق شارالارىن ۇيىمداستىرعانى ءۇشىن، قوعامدىق جيىنداردى ۇيىمداستىرۋ بويىنشا زاڭ تالاپتارىن بۇزعانى ءۇشىن دەگەن ايىپپەن 20 كۇنگە باس بوستاندىعىنان ايىرىلعان.

“The Qazaq Times”