ادەبيەت سالاسى بويىنشا نوبەل سىيلىعىنىڭ يەگەرى - كازۋو يشيگۋرو

ادەبيەت سالاسى بويىنشا نوبەل سىيلىعىنىڭ يەگەرى تەگى جاپون بولعانىمەن، ۇلىبريتانيا ازاماتى كازۋو يشيگۋرو اتاندى. شۆەد اكادەمياسى وعان "ادامنىڭ الەممەن يلليۋزيالىق سەزىمدەر ارقىلى بايلانىسىنا قۇرىلعان، جوعارى ەموتسيونالدى كۇشكە يە رومانداردىڭ اۆتورى" دەگەن باعا بەردى. بۇل تۋرالى ۆۆس جانە CNN اقپاراتتىق اگەنتتىكتەرى جازدى. 

كازۋو يشيگۋرو الەمنىڭ 40 تىلىنە اۋدارىلعان 8 كىتاپ جازعان. سوڭعى تۋىندىسى -  2015 جىلى جارىق كورگەن "The Buried Giant " (جەرلەنگەن الىپ) كىتابى. 62 جاستاعى جازۋشىعا ەرەكشە تانىمالدىلىق سىيلاعان "The Remains of the Day" (كۇننىڭ قالعان بولىگى) جانە  "Never Let Me Go" (مەنەن قول ۇزبە) شىعارمالارى بەلگىلى كينوفيلمدەرگە ارقاۋ بولعان.

كازۋو يشيگۋرو بەس  جاسىندا اتا-اناسىمەن بىرگە جاپونيادان ۇلىبريتانياعا قونىس اۋدارعان. كەنت ۋنيۆەرسيتەتىندە (University of Kent ) اعىلشىن ءتىلى مەن فيلوسوفيا ماماندىعى بويىنشا ءبىلىم العان. شىعىس انگليا ۋنيۆەرسيتەتىندە (University of East Anglia) كرەاتيۆتى جازۋ سالاسىندا ماگيستراتۋرانى تامامداعان. 1989 جىلى "The Remains of the Day" كىتابى ءۇشىن Booker Prize سىيلىعىن يەلەندى.

ۆۆس جۋرناليستەرى جازۋشىمەن بايلانىسقا شىققان كەزدە، نوبەل كوميتەتىنىڭ تەلەفون ارقىلى رەسمي راستاۋىن كۇتىپ وتىرعان كازۋو يشيگۋرو قاتتى قوبالجىپ، نوبەل سىيلىعىنىڭ نەلىكتەن ماڭىزدى ماراپات ەكەندىگىمەن بولىسكەن. ول: "نوبەل سىيلىعى مەنى ومىردەن وزعان اسقان تالانتتى، ۇلى جازۋشىلاردىڭ قاتارىنا قويادى. بۇل - وتە ۇلكەن ماقتانىش. قازىرگى تۇسىنىكسىز، تۇراقسىز الەمدە نوبەل سىيلىعىنا لايىقتى دەپ تانىلعان دۇنيەلەر ادامزات بالاسىن ءپوزيتيۆتى، جاقسى ىستەرگە ىنتالاندىرعانىن قالايمىن. مەنىڭ شىعارمالارىم دا سونداي ىزگى باستامالارعا مۇرىندىق بولسا، قۋانار ەدىم", - دەدى.

شۆەد اكادەمياسىنىڭ حاتشىسى سارا دەنيۋس جازۋشىنىڭ ءستيلىن "ازداپ دجەين وستينگە فرانتس كافكانى قوسىڭىز" دەپ باعالادى. تۇراقتى حاتشىعا قويىلعان "كازۋو يشيۋگۋرو وتكەن جىلعى لاۋرەات بوب ديلان سياقتى قىزۋ تالاس تۋدىرمايدى ما؟" دەگەن ساۋالعا ول "بۇعان قاتىستى ۇكىمدى شىعاراتىن مەن ەمەس. ءبىز تەك ەڭ ۇزدىك دەپ تانىعان جازۋشىمىزدى تاڭدادىق" ، -دەپ جاۋاپ بەردى.

ەستەرىڭىزگە سالا كەتەيىك، وتكەن جىلى ادەبيەت سالاسىنداعى نوبەل سىيلىعىن اۆتور-ورىنداۋشى، كينواكتەر بوب ديلان الىپ، بۇل شەشىممەن كەلىسپەگەندەردىڭ كوپ بولۋىنا بايلانىستى ماراپات جابىق تۇردە وتكەن سالتانات كەزىندە تابىستالعان بولاتىن. دەگەنمەن كازۋو يشيگۋرو 2005 جىلى Guardian باسىلىمىنا بەرگەن سۇحباتىندا "مەكتەپ كەزىندە بوب ديلاننىڭ اندەرىن ءسۇيىپ تىڭداۋشى ەدىم. ول مەنىڭ سۇيىكتى كەيىپكەرىم بولعان جانە سولاي قالا بەرەدى", - دەگەن ەدى.

كازۋو يشيگۋرو جوعارىدا اتالعان كولەمدى روماندارىنان بولەك، شاعىن اڭگىمەلەر مەن كينوفيلمدەرگە جانە تەلەباعدارلامالارعا ارناپ ستسەناريلەر جازادى. بيىلعى جىلى ادەبيەت سالاسى بويىنشا نوبەل سىيلىعىنا 240 ۇمىتكەر ۇسىنىلىپ، ونىڭ 195 تىركەلگەن.

“The Qazaq Times”