قىتاي ەل اۋماعىنداعى سولتۇستىك كورەيا كومپانيالارىن جاپپاي جابۋدا - دەپ حابارلايدى ۆۆس اقپارات قىزمەتى.

قىتاي بيلىگىنىڭ تاراتقان مالىمەتتەرى بويىنشا، رەسمي بەيجىڭ بۇنداي قادامعا بىرىككەن ۇلتتار ۇيىمىنىڭ سولتۇستىك كورەياعا سالعان سانكتسيالارىنان كەيىن بارعان. بەيجىڭ شىعارعان شەشىم بويىنشا، قىتاي اۋماعىنداعى كحدر كومپانيالارىنىڭ بارلىعى 2018 جىلدىڭ قاڭتار ايىندا ءوز جۇمىسىن توقتاتاتىن بولادى.

رەسمي بەيجىڭ پيوڭياڭنىڭ باستى ساۋدا سەرىكتەسى. ول وسى ۋاقىتقا دەيىن رەسەيمەن بىرگە بۇۇ-نىڭ قاىپسىزدىك كەڭەسىندە سولتۇستىك كورەيانى قورعاپ كەلگەن. بىراق بىرىككەن ۇلتتار ۇيىمىنىڭ قىركۇيەكتىڭ 11-ءى كۇنى كحدر-نا سانكتسيا سالۋعا بايلانىستى شىعارعان شەشىمىنەن كەيىن، قىتاي سولتۇستىك كورەياعا دەگەن كوزقاراسىن وزگەرتكەن. بەيجىڭ پيوڭياڭنىڭ يادرولىق باعدارلاماسىن قاتاڭ سىڭعا الىپ، زىمىراندارىن سىناقتان وتكىزۋىن توقتاتۋىن تالاپ ەتكەن بولاتىن. كوپتەگەن شەتەلدىك ساراپشىلاردىڭ پىكىرىنشە، قىتايدىڭ سولتۇستىك كورەياعا بۇنداي قاتاڭ شارالار قولدانۋىنا اقش پرەزيدەنتى دونالد ترامپتىڭ قىسىم كورسەتۋى سەبەپ بولعان.

ەستەرىڭىزگە سالايىق، جاقىندا دونالد ترامپ: «ەگەردە اقش-قا نەمەسە ونىڭ وداقتاستارىنا كحدر تاراپىنان قاندايدا ءبىر قاۋىپ تونەتىن بولسا، وندا ۋاشينگتون سولتۇستىك كورەيانى جەر بەتىنەن جوق قىلۋعا دايىن» - دەپ مالىمدەگەن بولاتىن. ال رەسمي پيوڭياڭ ترامپتىڭ بۇل ءسوزىن «ءيتتىڭ ۇرۋىنە» تەڭەگەن ەدى.

“The Qazaq Times”