مەكسيكادا جەر سىلكىنىسى كەزىندە جوعالعان ادامداردى ىزدەستىرۋ جۇمىستارى جالعاسۋدا

مەكسيكادا 300-گە جۋىق ادامنىڭ ءومىرىن قيىپ، بىرقاتار عيماراتتاردىڭ قۇلاۋىنا سەبەپ بولعان 7.1 باللدىق جەر سىلكىنىسىنەن كەيىن 5 كۇن بويى جالعاسىپ كەلە جاتقان ۇيىندىلەردىڭ استىندا قالعان ادامداردى ىزدەستىرۋ جۇمىستارىنىڭ ناتيجەسى كوڭىل قۋانتپاي وتىر. العاشقى ءۇش كۇن ىشىندە 69 ادام ءتىرى كۇيىندە قۇتقارىلسا، جۇمادان بەرى تەك ءولى دەنەلەر تابىلىپ جاتىر. بۇل تۋرالى APF اقپاراتتىق اگەنتتىگى جازدى. 

جەر سىلكىنىسىنەن زارداپ شەككەن جانۇيالاردىڭ ءوتىنىشى بويىنشا قالانىڭ ءارتۇلى اۋداندارىندا ىزدەستىرۋ جۇمىستارىن جۇرگىزۋگە مەملەكەتتىڭ قۇتقارۋ قىزمەتىنەن بولەك، اقش، جاپونيا سياقتى ەلدەر جىبەرگەن ماماندار، ارنايى جاتتىقتىرىلعان يتتەر جانە جوعارى تەحنولوگيالىق قۇرالداردى پايدالانىپ جاتىر.

وسى سەنبىدە ەلدىڭ وڭتۇستىك بولىگىندە بولعان 6.1 باللدىق جەر سىلكىنىسى كەزىندە تاعى 3 ادام قازا تاۋىپ، الدىڭعى اپاتتان ەسەڭگىرەگەن حالىقتىڭ ۇرەيىن الدى. جەرگىلىكتى حالىق مەكسيكادا 1985 جىلى بولعان جەر سىلكىنىسىن ءالى ۇمىتا قويعان جوق. ول كەزدە اپات سالدارىنان 10 مىڭ ادام قازا تاپقان بولاتىن. دەگەنمەن وتباسى مۇشەلەرىن قۇلاعان عيماراتتار استىندا جوعالتىپ العان جاندار 1985 جىلى اراعا ءبىر اپتا سالىپ، تاس ءۇيىندىنىڭ استىنان ءتىرى تابىلعاندار تۋرالى اڭىزدارعا سۇيەنىپ، ءالى دە ءۇمىت ۇزبەي وتىر. ال ساراپشىلار، اپاتتان كەيىن ءۇش كۇن وتسە، ءۇيىندىنىڭ استىنان ءتىرى ادامدى ارشىپ الۋ ىقتيمالدىلىعى تومەن ەكەنىن ايتادى.

“The Qazaq Times”