ترامپ: مەن يران يادرولىق كەلىسىمى تۋرالى شەشىم قابىلداپ بولدىم

اقش پرەزيدەنتى دونالد ترامپ سارسەنبى كۇنى وتكەن ءباسپاسوز ماجىلىسىندە، امەريكا قۇراما شتاتتارى يراننىڭ يادرولىق كەلىسىمىن قولدايتىنى تۋرالى شەشىم قابىلداعانىن، الايدا، بۇل شەشىم اقش-تىڭ اتالعان ماسەلەدەگى ەڭ سوڭعى مامىلەسى ەمەس ەكەنىن جەتكىزدى. بۇل تۋرالى «The Wall Street Journal» باسىلىمى حابارلادى.

ترامپ پەن پالەستينا پرەزيدەنتى ماحمۋد ابباستىڭ بىرلەسىپ وتكىزگەن ءباسپاسوز كونفەرەنتسياسى كەزىندە ترامپ يران يادرولىق كەلىسىمى تۋرالى ءبىر مامىلەگە كەلگەنىن مالىمدەدى. سودان ءبىر كۇن بۇرىن ول بۇۇ باس اسسامبلەياسىندا ءسوز سويلەپ، يرانمەن جاساسقان يادرولىق كەلىسىمدى جەرىنە جەتكىزە سىناعان ەدى. ول ءتىپتى «بۇل كەلىسىم اقش-تىڭ قول جەتكىزگەن، ەڭ سوراقى، ەڭ ادىلەتسىز كەلىسىمى» دەگەن بولاتىن.

ترامپ ەندىگى جەردە ءوزىنىڭ يادرولىق كەلىسىمگە بايلانىستى شەشىم قابىلداپ بولعانىن جەتكىزىپ وتىر. ءارى بۇعان الەمنىڭ نازارىن اۋدارتۋ ماقساتىندا «مەن يران يادرولىق كەلىسىمى تۋرالى شەشىم قابىلداپ بولدىم» دەگەن ءسوزدى جۋرناليستەر مەن ساياساتكەرلەر الدىندا ەكى رەت قايتالاي ايتتى. بۇعان قوسىمشا تۇسىنىكتەمە سۇراعان جۋرناليستەرگە ترامپ كۇلە تۇرىپ: «بۇل تۋرالى تاعىدا ايتاتىن بولام» دەپ قانا جاۋاپ بەرگەن.

“The Qazaq Times”