اقش پرەزيدەنتى بۇۇ جينالىسىندا سولتۇستىك كورەياعا قاتاڭ ەسكەرتۋ جاسادى

اقش پرەزيدەنتى دونالد ترامپ سەيسەنبى كۇنى بۇۇ باس اسسامبلەياسىندا ءسوز سويلەدى. ول سوزىندە كحدر-عا اشىق تا قاتاڭ ەسكەرتۋ جولدادى. ەگەر اقش ءوزىنىڭ جانە وداقتاستارىنىڭ قاۋىپسىزدىگىن قورعاۋعا تۋرا كەلگەن جاعدايدا، پيوڭياڭ (پحەنيان) رەجيمىنە اۋىر قىسىم جاساۋى مۇمكىن ەكەنىن دە اشىق ايتتى. ءتىپتى ولاي بولعان جاعدايدا سولتۇستىك كورەيانىڭ تولىعىمەن جويىلىپ كەتۋى مۇمكىن ەكەنىن دە ەسكەرتتى. بۇل تۋرالى «The Wall Street Journal» باسىلىمى جازدى.

ترامپ الەم باسشىلارىنىڭ الدىندا، اقش-تىڭ زور كۇش-قۋات پەن شىدامدىلىققا يە ەكەنىن ايتا كەلىپ، الايدا، ەگەر وزدەرىن نەمەسە ءوزىنىڭ وداقتاستارىن قورعاۋعا تۋرا كەلسە، قۇراما شتاتتا ەشقانداي تاڭداۋ قالمايدى – سولتۇستىك كورەيانى جويىپ جىبەرەدى دەدى. ول جانە سولتۇستىك كورەيا ۇكىمەتىن «جەكسۇرىن ۇكىمەت» دەپ، ال كيم جوڭ ۋندى (كيم چەن ىن/Kim Jong Un) «زىمىران ادام» دەپ اتاعان. بۇل لاقاپ اتتاردى ول العاش رەت وتكەن اپتانىڭ سوڭىندا ءوزىنىڭ تۆيتتەر پاراقشاسىندا ايتقان بولاتىن. ول الەۋمەتتىك جەلى پاراقشاسىندا: «زىمىران ادام» ءوزىن-ءوزى ورعا يتەرۋدە، ءتىپتى ول ءوزىن عانا ەمەس تۇتاس سولتۇستىك كورەيا رەجيمىنىڭ تاعدىرىن قيىنداتۋدا»، – دەگەن ەدى.

اقش پرەزيدەنتى وسىدان كەيىن يراندى دا سوزبەن تۇيرەپ اكەتتى. ول يراننىڭ رەجيمىن ديكتاتورلىق رەجيم دەپ اتادى جانە يراننىڭ اقش باستاتقان التى جاقپەن 2015 جىلى جاساسقان يادرولىق قارۋ تۋرالى كەلىسىمىن سىنعا الدى. ترامپتىڭ ايتۋىنشا، يراننىڭ يادرولىق كەلىسىمى قۇراما شتاتتار قول جەتكىزگەن ەڭ ناشار جانە ادىلەتسىز كەلىسىمدەردىڭ ءبىرى ەكەن. ونىڭ پىكىرىنشە، بۇل كەلىسىم امەريكا قۇراما شتاتتارى ءۇشىن ۇيات بولىپ سانالادى جانە ول بۇل تۋرالى سوڭعى رەت ەندى اۋىزعا دا المايتىنىن ايتتى.

دەلەگاتتار ترامپتىڭ سوزىنە باسقاشا جاۋاپ بەردى. ول ءوزىنىڭ «امەريكالىق باسىمدىق» ۇستانىمىن ءسوز ەتتى جانە ونى ەگەمەن مەملەكەتتەر اراسىنداعى تاۋەلسىز، ىنتىماقتاستىق مودەلى دەپ اتادى. امەريكانىڭ جاقىن دوسى سانالاتىن يزرايل ترامپتىڭ يرانعا قاتىستى ۇستانىمىن جوعارى باعالايتىنىن جەتكىزدى. يزمير پرەمەر-ءمينيسترى ترامپتان كەيىن مالىمدەمە جاساعاندا، 30 جىلدان بەرى بۇۇ جينالىسىنا قاتىسىپ كەلە جاتسا دا، مۇنداي باتىل دا، انىق پوزيتسيانى العاش رەت كەزدەستىرىپ وتىرعانىن ايتتى.

الايدا، ترامپ جانە نەتانياحۋدىڭ (يزرايل پرەمەرى) يراننىڭ 2015 جىلعى يادرولىق كەلىسىمى تۋرالى پىكىرلەرىنە وزگە الەم باسشىلارى كەلىسىم بەرمەدى. ال، كەيبىر دەلەگاتتاردى ترامپتىڭ سولتۇستىك كورەياعا قارسى ايتقان سوزدەرى الاڭداتتى.

“The Qazaq Times”