وڭتۇستىك كورەيا مەن اقش قىتايدىڭ قارسىلىعىنا قاراماستان زىمىرانعا قارسى جۇيەنى ورناتتى

بۇگىن وڭتۇستىك كورەيانىڭ قورعانىس مينيسترلىگى وڭتۇستىك كورەيا مەن اقش-تىڭ سەۋلگە جاقىن جەردە ورنالاستىرماق بولعان «ساد» زىمىرانعا قارسى جۇيەسىنىڭ قۇرىلىسىن اياقتاۋدى جوسپارلاپ وتىرعانىن جەتكىزدى. قىتاي، رەسەي، سولتۇستىك كورەيانىڭ قارسىلىعىنا ۇشىراپ كەلگەن بۇل زىمىران قورعانىس جۇيەسى اقىرى وڭتۇستىك كورەيا جەرىندە ورنالاستىرىلاتىن بولدى. ءارى بۇل جۇيە قازىرگى كەزدەگى ەڭ دامىعان اۋە قورعانىس جۇيەسىنىڭ ءبىرى. بۇل تۋرالى «The New York Times» باسىلىمى حابارلاپ وتىر.

قىتاي بۇل جۇيەنى ورنالاستىرۋعا تۇبەگەيلى قارسى بولىپ كەلدى. بەيجىڭ تارابى بۇل جۇيەنى ورناتۋ قحر تەرريتورياسىنداعى زىمىرانداردى دا تەجەپ، قىتايدىڭ ستراتەگيالىق قاۋىپسىزدىگىنە قاتەر تونەدى، سولتۇستىك كورەيا مەن باسقا ەلدەردىڭ اراسىنداعى قارىم-قاتىناستى تىعىرىققا تىرەيدى دەپ سانايدى. الايدا، وڭتۇستىك كورەيا مەن اقش قورعانىس وكىلدەرى بۇل جۇيەنى ورناتۋداعى باستى ماقساتتارى "سولتۇستىك كورەيانىڭ بالليستيكالىق جانە يادرولىق قارۋ تيەگەن زىمىراندارىنان قورعانۋ" دەپ اتاپ كورسەتتى.

اقش پەن وڭتۇستىك كورەيا «ساد» زىمىرانعا قارسى جۇيەسىن كورەي تۇبەگىندە ورنالاستىرۋ كەلىسىمىنە وتكەن جىلدىڭ شىلدە ايىندا قول جەتكىزدى. سولتۇستىك كورەيا بالليستيكالىق زىمىران سىناقتارى كوبەيگەن تۇستا، وڭتۇستىك كورەيانىڭ جاڭا پرەزيدەنتى ءمۇن جا-ين اقش-پەن اتالعان جۇيەنى ورنالاستىرۋ ىستەرىن جەدەلدەتە ءتۇستى. الايدا، قىتاي جاق بۇعان ەكونوميكالىق شەكتەۋلەرمەن جاۋاپ بەرىپ، قىتايداعى كورەيالىق كاسىپورىندارعا قىسىم جاسادى.

وسىنداي قايشىلىقتاردان كەيىن دە جۇزەگە اسىرىلعان «ساد» زىمىرانعا قارسى جۇيەسى، قىتايدىڭ كورەي تۇبەگى ماسەلەسىندەگى الداعى قادامدارىنا تىكەلەي اسەر ەتەدى دەپ قاراۋعا بولادى. ءتىپتى، قىتاي سولتۇستىك كورەياعا باعىتتالعان شەكتەۋ شارالارىنان دا باس تارتۋى عاجاپ ەمەس. بۇل قادامدار قىتاي جانە باسقا دا اقش-پەن وداقتاس ەلدەردىڭ قارىم-قاتىناسىن شيەلەنىستىرىپ، تۇبەك جاعدايىندا قوسالقى قايشىلىق قالىپتاستىرۋى مۇمكىن.

“The Qazaq Times”