فوتو: BBC

سولتۇستىك كورەيا بيلىگى جاپونياعا قارسى ۇشىرىلعان زىمىران تىنىق مۇحيتىنداعى اسكەري قيمىلداردىڭ العاشقى قادامى بولاتىنىن جانە يادرولىق شابۋىلدار ارى قاراي جالعاساتىنىن جەتكىزدى. كحدر-نىڭ مەملەكەتتىك باسىلىمدارى تىنىق مۇحيتىنداعى گۋام ارالىن "باسىپ-كىرۋ وپەراتسياسىن باستاۋعا ارنالعان الدىڭعى قاتارلى نىسان" دەپ اتاعان بولاتىن. بۇل تۋرالى BBC اقپاراتتىق اگەنتتىگى جازدى. 

سەيسەنبى كۇنى كەشكە نيۋ-يوركتە باس قوسقان بۇۇ قاۋىپسىزدىك كەڭەسى سولتۇستىك كورەيانىڭ ارەكەتىن ايىپتاپ، پيوڭياڭنان (پحەنيان) يادرولىق شابۋىلدارىن دوعارۋدى تالاپ ەتتى. بۇۇ-نىڭ بايانداماسىندا سوڭعى وقيعالار ۇيىمعا مۇشە مەملەكەتتەردىڭ بارلىعى ءۇشىن ۇلكەن قاۋىپ-قاتەر ءتوندىرىپ وتىرعانى ايتىلعانىمەن، سولتۇستىك كورەياعا قارسى جاڭا سانكتسيالار نە شەكتەۋ شارالارىن ەنگىزۋ تۋرالى ءسوز قوزعالعان جوق.

رەسەي مەن قىتاي جاپونياعا قارسى ۇشىرىلعان زىمىران وقيعاسىنا اقش-تىڭ كورەي جارتىتۇبەگىندەگى اسكەري بەلسەندىلىگىن توقتاتپاعانىن كىنالادى. جاپونياعا رەسمي ساپارمەن بارعان ۇلىبريتانيانىڭ پرەمەر-ءمينيسترى تەرەزا مەي سولتۇستىك كورەيانىڭ اقىلعا  قونىمسىز ارەكەتتەرىنىڭ ءورشي تۇسۋىنە قىتايدىڭ ىقپالى زور بولعانىن اتاپ ءوتىپ، بەيجىڭدى كحدر-عا قىسىمدى كۇشەيتۋگە شاقىردى.

وسى اپتانىڭ سەيسەنبىسىندە سولتۇستىك كورەيادان ۇشىرىلعان بالليستيكالىق زىمىران جاپونيانىڭ حوككايدو ارالىنىڭ ۇستىنەن تومەن بيىكتىكتە ۇشىپ ءوتىپ، 2 مىڭ 700 كم-دەن سوڭ، شىعىس جاعالاۋعا بارىپ، قۇلاعان.

سولتۇستىك كورەيانىڭ باق وكىلدەرى كيم جوڭ ۋن (كيم چەن ىن) تىنىق مۇحيت باعىتىنا ۇزاق قاشىقتىقتى ەڭسەرەتىن جاڭا زىمىراندار ۇشىرۋدى جوسپارلاپ وتىر دەپ جارىسا جازدى. وسىدان بۇرىن كحدر اقش-تىڭ تىنىق مۇحيتىنداعى ۇلكەن اسكەري بازاسى گۋام ارالىن بومبىلاۋعا نيەت بىلدىرگەن ەدى. گۋام ارالىندا 160 مىڭ امەريكالىق ازامات تۇرادى.

“The Qazaq Times”