ماسكەۋ اقش سانكتسياسىنا جاۋابىن ازىرلەپ جاتىر

اقش-تىڭ رەسەيگە قاراتا سالعان سانكتسياسىنىڭ كولەمى ارتىپ كەلە جاتىر. سەيسەنبى كۇنى اقش ۇكىمەتى قىتاي مەن رەسەيدىڭ 16 ۇيىمى مەن جەكە تۇلعالارىنا، سولتۇستىك كورەيانىڭ زاڭسىز ساۋدا اينالىمىنا قاتىسى بار دەگەن ايىپپەن سانكتسيا سالدى. وسىعان وراي رەسەي سىرتقى ىستەر ءمينيسترىنىڭ ءبىرىنشى ورىنباسارى مالىمدەمە جاساپ، ماسكەۋ جاقتىڭ ۋاشينگتون تاراپىنا لايىقتى جاۋابىن ازىرلەپ جاتقانىن ايتتى. بۇل تۋرالى يرنا-عا سىلتەمە جاساي وتىرىپ، «Parstoday» اقپاراتتىق اگەنتتىگى حابارلادى.

رەسەي ءسىم باسشىسىنىڭ ورىنباسارى سوزىندە: «باراك وباما تۇسىنان باستالعان رەسەي مەن اقش ارا-قاتىناسىنىڭ ناشارلاۋى بۇگىندە جالعاسىن تاپتى. ماسكەۋ ارقاشان قايشىلىقتاردى كەلىسسوز ارقىلى شەشۋدى قالايدى. ال، اقش بولسا وسى كەزگە دەيىن سانكتسيالاردىڭ كەلىسسوزگە كەدەرگى بولىپ، ەكى ەل اراسىنداعى قارىم-قاتىناستى شيەلەنىستىرە تۇسەتىنىن تۇسىنبەي كەلدى»، – دەپ ايىپتادى. سونداي-اق ول سوزىندە الداعى ۋاقىتتا ماسكەۋ جاقتىڭ اقش سانكتسياسىنا قارسى پارمەندى جاۋاپ ازىرلەپ جاتقانىن باسا ايتىپ ءوتتى.

ازىرگە ماسكەۋدىڭ اقش سانكتسياسىنا قانداي جاۋاپ ازىرلەپ وتىرعانى بەلگىسىز. بىراق، كەزەكتى سانكتسيانىڭ بولماسا دا، بۇدان بۇرىنعى جانە الداعى بولۋى مۇمكىن شەكتەۋ شارالارى ورتا ازيا ەلدەرىنە، قازاقستانعا اسەر ەتپەيدى دەپ ايتا المايمىز. ءدۇرداراز اقش پەن رەسەي اراسى تاتۋلىقتان بارعان سايىن الىستاپ بارادى. دەسە دە ءبىر نارسە انىق – سانكتسيا ەكى ەلدى تاتۋلىققا شاقىرمايدى. ەسەسىنە، اقش پەن سانكتسيا ۇشىنا ىلىككەن ەلدەر اراسىندا ارازدىقتى كۇشەيتەدى.

“The Qazaq Times”