«Schneider & Danzey FZC» كومپانياسى باسشىلارىنىڭ ءبىرى يورگا شنايدەر مەن وڭتۇستىك قازاقستان وبلىسىنىڭ اكىمى جانسەيىت تۇيمەباەۆ

بىرىككەن اراب امىرلىگىنىڭ «Schneider & Danzey FZC» كومپانياسى وڭتۇستىك قازاقستان وبلىسىنان تۇرمىستىق قاتتى زاتتاردى قايتا وڭدەۋدەن وتكىزەتىن زاۋىت قۇرلىسىن سالۋعا نيەتتى. بۇل تۋرالى اتالعان كومپانيانىڭ باسشىلارى يورگا شنايدەر مەن كرەيگ دەنزيدىڭ وڭتۇستىك قازاقستان وبلىسىنىڭ اكىمى جانسەيىت تۇيمەباەۆپەن كەزدەسۋىندە ءمالىم بولدى، دەپ حابارلايدى وبلىس اكىمدىگىنىڭ ءباسپاسوز قىزمەتى. 

كەزدەسۋدە قوناقتار ءوڭىر باسشىسىنا كومپانيا تۋرالى تولىق اقپارات بەرىپ، ىسكە اسىرىلعالى وتىرعان ينۆەستيتسيالىق جوباسىن تانىستىردى. 25 جىلدىق تاريحى بار كومپانيا ءتۇرلى سالالاردا ەڭبەك ەتەدى. نەگىزىنەن بيزنەس جوبالاردى ازىرلەپ، ينۆەستيتسيالىق ءىرى قۇرىلىمداردى قۇرۋعا جاردەمدەسەدى. كومپانيانىڭ باس عيماراتى بىرىككەن اراب امىرلىگىنىڭ راس-ال-حايما قالاسىندا ورنالاسقان.

«ءبىزدىڭ ماقساتىمىز -  وڭتۇستىك قازاقستان وبلىسىنان تۇرمىستىق قاتتى زاتتاردى قايتا وڭدەۋدەن وتكىزەتىن زاۋىت سالۋ.  بۇل رەتتە ءبىزدىڭ كومپانيا نەگىزگى ەكى باعىتتا جۇمىس ىستەۋدى كوزدەپ وتىر. ونىڭ العاشقىسى – تۇرمىستىق قالدىقتاردى قايتا وڭدەۋ بولسا، ەكىنشىسى – جاسىل ەكونوميكا سالاسىن دامىتۋ. اتالعان ەكى جوبا دا ەكولوگياعا زيانسىز ءارى ەكى جاققا دا وتە ءتيىمدى دەپ ويلايمىز»، - دەدى يورگا شنايدەر مىرزا.

شەتەلدىك قوناقتاردىڭ ينۆەستيتسيالىق جوباسىمەن تانىسقان وبلىس باسشىسى ءوڭىردىڭ ەكونوميكالىق الەۋەتىن بايانداپ، ينۆەستورلارعا مەملەكەت تاراپىنان كورسەتىلەتىن جەڭىلدىكتەردى ءتۇسىندىردى.

«تۇرمىستىق قالدىقتاردى وڭدەۋ بويىنشا وبلىسىمىزعا بۇعان دەيىن دە بىرنەشە ۇسىنىستار كەلىپ تۇسكەن بولاتىن. الايدا ولاردىڭ بىرقاتارى قاعاز جۇزىندە ىسكە اسپاي قالدى. وعان بىرقاتار سەبەپتەر بولعانى دا جاسىرىن ەمەس. ەندىگى ماسەلە – اتالعان زاۋىتتىڭ قۇرىلىسىن تەزدەتىپ باستاپ، ىسكە اسىرۋ وتە ماڭىزدى. بۇل رەتتە جەرگىلىكتى بيلىك ارنايى جۇمىسشى توبىن قۇرىپ، اتقارىلاتىن شارۋالاردىڭ كەستەسى ءتۇزىلۋى ءتيىس»، - دەدى ج. تۇيمەباەۆ.

بۇگىندە وبلىس حالقىنىڭ سانى كۇن ساناپ ارتىپ كەلەدى. ياعني تۇتىنۋشى بار جەردە قوقىستىڭ دا ارتا تۇسەتىنى زاڭدىلىق. وسى ماسەلەگە توقتالعان ءوڭىر باسشىسى اتالعان زاۋىتتى تۇركىستان مەن كەنتاۋ قالالارى توڭىرەگىنەن نەمەسە سارىاعاش، ماقتارال اۋداندارىنىڭ ماڭىنان سالۋدى ۇسىندى.

“The Qazaq Times”