فوتو: akorda.kz

قر پرەزيدەنتى نۇرسۇلتان نازارباەۆ ۇلتتىق بانك توراعاسى دانيار اقىشەۆتى قابىلدادى. بۇل تۋرالى اقوردانىڭ ءباسپاسوز قىزمەتى حابارلادى.

كەزدەسۋدە پرەزيدەنتكە ۇلتتىق بانكتىڭ ەلىمىزدىڭ قارجى سەكتورىن ىلگەرىلەتۋ جونىندەگى جۇمىستارىنىڭ قورىتىندىسى تۋرالى ەسەپ بەرىلدى.

قازاقستان پرەزيدەنتى قازىر ۇلتتىق ۆاليۋتانىڭ ەركىن ايىرباس باعامى ساياساتىنىڭ جۇرگىزىلىپ جاتقانىن ايتىپ، ۇلتتىق بانكتىڭ ينفلياتسيا وسىمىنە جول بەرمەۋ جونىندەگى مىندەتىن ەرەكشە اتاپ ءوتتى.

سونىمەن قاتار، د.اقىشەۆ نۇرسۇلتان نازارباەۆقا ۆاليۋتا جانە قارجى نارىعىنداعى قازىرگى احۋال تۋرالى باياندادى.

"جالپى، احۋال تۇراقتى. قازىر تامىز ايىنىڭ باسىندا ىشكى جانە سىرتقى سيپاتتاعى جەكەلەگەن فاكتورلار اسەرىنەن بولعان اۋىتقۋلاردان كەيىن ايىرباس باعامى تۇراقتاندى. الاڭداۋعا ەش نەگىز جوق", – دەدى ۇلتتىق بانك توراعاسى.

“The Qazaq Times”