كاشميرگە تالاس تاعى ءورشىپ كەلەدى

پاكىستان ۇكىمەتى ءۇندىستان ۇكىمەتىن كاشمير وڭىرىندە، بيىل ءبىر جىلدىڭ ىشىندە، 600 رەتتەن استام ارانداتۋشىلىق ارەكەتكە باردى دەپ ايىپتادى. سونىڭ سالدارىنان پاكىستاندىق 34 بەيبىت تۇرعىننىڭ قازا تاپقانىن العا تارتتى. بۇل تۋرالى «Hindustan Times» ء(ۇندىستان تايمس) باسىلىمىنا سىلتەمە جاساي وتىرىپ، «شينلاڭ» اقپاراتتىق سايتى جازدى.

پاكىستاننىڭ ءسىم مالىمدەمەشىسى نافيس زاكاريا ءۇندىستان ۇكىمەتىنىڭ كوشى-قون ارقىلى كاشمير جەرگىلىكتى حالقىنىڭ دەموگرافيالىق قۇرامىن وزگەرتۋگە ۇمتىلىپ وتىرعانىن ايىپتادى.  بۇل تۋرالى پاكىستان سىرتقى ىستەر مينيسترلىگىنىڭ وكىلى تۇراقتى وتكىزىلەتىن اپتالىق ءباسپاسوز كونفەرەنتسياسىندا ايتتى. سونىمەن بىرگە ول، بۇرىنعى پاكىستان پرەمەر-ءمينيسترى اتىنان بۇۇ-عا جولدانعان حاتتا دا، ءۇندىستاننىڭ كاشمير حالقىنىڭ دەموگرافيالىق قۇرامىن وزگەرتۋگە تىرىسقان ارەكەتى ۇستىنەن شاعىمدانعاندارىن ايتىپ ءوتتى.

پاكىستان جاق بۇعان قوسا، بۇۇ اسكەري باقىلاۋشىلار توبىنىڭ ءۇندىستان ۇكىمەتى جاعىنان شەكتەۋگە ۇشىراپ وتىرعانىن دا اتاپ ءوتتى. 1947 جىلى ءۇندىستان مەن پاكىستان بولىنگەننەن كەيىن، ەكى ەل اراسىندا كاشمير ءوڭىرى ءۇشىن تالاس سوعىس جۇرگىزىلدى. 2003 جىلى قوس تاراپ كاشمير ماسەلەسىندە كەلىسسوز جۇرگىزىپ، قاقتىعىستى توقتاتىپ، ورتاق باقىلاۋ ايماعى رەتىندە كەلىسىمگە قول قويدى. الايدا، ەكى ەل اراسىندا قاقتىعىستار تولاستاپ قالعان جوق. سوڭعى كەزدەرى، ءۇندىستان-قىتاي، ءۇندىستان-پاكىستان اراسىنداعى شەكارالىق داۋلار ءورشىپ، پاكىستان مەن قىتايدىڭ ستراتەگيالىق وداقتاستىعىن ارتتىرا ءتۇستى.

“The Qazaq Times”