سولتۇستىك كورەيا گۋام ارالىن زىمىرانمەن اتقىلايتىنىن مالىمدەدى

سولتۇستىك كورەيانىڭ «ورتالىق اقپارات» اگەنتتىگى 8 شىلدە تاراتقان حابارىندا، سولتۇستىك كورەيا قارۋلى كۇشتەرى اقش-قا قاراستى گۋام ارالى ماڭىن بالليستيكالىق زىمىرانمەن اتقىلاۋعا دايىندالىپ جاتىر دەپ مالىمدەدى. بۇل تۋرالى اتالعان اگەنتتىككە سىلتەمە جاساي وتىرىپ، «شينحۋا» اگەنتتىگىنىڭ رەسمي سايتى حابارلايدى.

KCNA (سولتۇستىك كورەيا ورتالىق اقپارات اگەنتتىگى) قحدر حالىق ارمياسىنىڭ ستراتەگيالىق قولباسشىلىق ورتالىعىنىڭ وكىلى 8 شىلدە كۇنگى سوزىندە: «امەريكا قۇراما شتاتىنىڭ گۋام ارالىنداعى اندەرسەن اۋە بازالارى مەن ستراتەگيالىق بومبالاۋشى ۇشاقتارىن توسۋ جانە جولىن كەسۋ ءۇشىن، سونىمەن بىرگە اقش-قا قاتاڭ ەسكەرتۋ سيگنالىن بەرۋ ءۇشىن، قحدر حالىق ارمياسى «مارس-12» بالليستيكالىق زىمىرانى ارقىلى گۋام ارالى ماڭىنا شابۋىل وپەراتسياسىنا مۇقيات دايىندالىپ جاتىر»، – دەدى.

گۋام ارالى. فوتو: maps.google.kz/ WeChat-1610955873/

«قاتىستى دەپارتامەنتتەر وپەراتسيانى تولىقتاي زەرتتەۋ، تۇجىرىمداۋ قىزمەتتەرىن اياقتاپ بولعاننان كەيىن، كحدر قارۋلى كۇشتەرىنىڭ ەڭ جوعارى قولباسشىسى، كحدر ەڭ جوعارى باسشىسى كيم جوڭ ۋن (Kim Jong Un) سوڭعى شەشىمدى قابىلدايدى. ەڭ جوعارى باسشىنىڭ پارمەنىمەن وپەراتسيا كەز-كەلگەن ۋاقىتتا جۇزەگە اسادى»، – دەپ مالىمدەدى سولتۇستىك كورەيا حالىق ارمياسىنىڭ وكىلى.

سولتۇستىك كورەيا اقش-تىڭ جاقىندا جاساعان قۇرلىقارالىق زىمىران سىناعىن، ستراتەگيالىق بومبالاۋشى ۇشاقتارىن كورەي تۇبەگىنە جاقىن ۇشىرىپ، ارانداتۋشىلىق جاسادى دەپ ايىپتادى. سونىمەن بىرگە، سولتۇستىك كورەيا قارۋلى كۇشتەرىنىڭ رەسمي مالىمدەمەشىسى، اقش-تىڭ بۇل ءىسى كحدر رەجيمىنە قارسى، تۇبەكتىڭ قاۋىپسىزدىگىنە قارسى ارانداتۋ ماقساتى بار دەپ كورسەتتى. ول سوزىندە سولتۇستىك كورەيا اۋە كەڭىستىگىنە جاقىن ۇشاتىن اقش ستراتەگيالىق بومبالاۋشى ۇشاقتارى، گۋام ارالدارىنان ۇشىپ شىعاتىنىن العا تارتتى. گۋام ارالىنىڭ اقش ءۇشىن اسا ماڭىزدىلىعىن ايتا كەلىپ، قۇراما شتاتتىڭ قاستىعىن جۇزەگە اسىرماۋ ءۇشىن وسى قادامعا باراتىندارىن ايتىپ ءوتتى.

“The Qazaq Times”