رۋحاني: اقش يران الدىندا جەڭىلىسىن مويىنداپ، ساباق الۋى كەرەك

يران پرەزيدەنتى اقش-تىڭ يرانعا قاراتقان جاڭا سانكتسياسى تۋرالى پىكىرىن ءبىلدىردى. «پارس.اقپارات» اگەنتتىنىڭ حابارىنا قاراعاندا، يران پرەزيدەنتى حاسان رۋحاني اقش كونگرەسىنىڭ يرانعا قاراتقان جاڭا سانكتسيا جوباسى تۋرالى ايتا كەلىپ: «يران اقش-تىڭ جاڭا ارەكەتىنە كەسىمدى جاۋاپ بەرەتىن بولادى»، – دەگەن پىكىرىن ءبىلدىردى.

يران پرەزيدەنتى ۇكىمەتتىڭ ارنايى وتىرىسىندا: «اقش يرانعا 40 جىلدان بەرى قىسىم جاساپ، سانكتسيا سالىپ كەلدى. ءتىپتى ايماقتاعى كورشىلەس ەلدەردى دە ايداپ سالىپ، ارانداتۋشىلىق تۋعىزۋ ىستەرىنىڭ ءبارى اقش-تىڭ جەڭىلىسىمەن اياقتالىپ كەلدى. امەريكالىقتار يران حالقىمەن بەتپە-بەت كەلۋدەگى جەڭىلىستەرىنەن ساباق الۋى كەرەك»، – دەدى. ول تاعى: «ەگەر اقش سەزىمتال ورتا-شىعىس ايماعى مەن ونداعى ماڭىزدى سۋ جولدارى الەم ءۇشىن قاۋىپسىز بولسىن دەسە، وندا يرانعا قاراتقان مۇنداي جاۋلىق ساياساتىن دوعارۋى كەرەك. امەريكا يران حالقىنىڭ قۇقىعىن قۇرمەتتەگەندە عانا بەيبىتشىلىكتى قولعا كەلتىرە الادى»، – دەدى. يران ۇكىمەتىنىڭ قاراۋىنشا، اقش يراننىڭ ورتا شىعىس جانە پارسى شىعاناعىنداعى ىقپالدى ەل ەكەنىن مويىنداعىسى كەلمەيدى.

ەستەرىڭىزگە سالا كەتەيىك، اقش كونگرەسى ءبىر كۇن بۇرىن رەسەي، يران جانە سولتۇستىك كورەياعا قاراتقان جاڭا سانكتسيا جوباسىن ماقۇلداعان بولاتىن. بۇل اقش-تىڭ سىرتقى ساياساتىندا بىرقاتار جاڭا وزگەرىستەردى الىپ كەلەدى دەپ كۇتىلۋدە. سەيسەنبى كۇنى كەشتە اقش كونگرەسى وكىلدەر پالاتاسى 419 داۋىسپەن سانكتسيا جوباسىن ماقۇلداپ، يرانعا باعىتتالعان جاڭا ساياساتتى جولعا قويدى.

“The Qazaq Times”