فوتو: BBC

قازىر اقش-تان ساياسي پانا الىپ وتىرعان تەگى تۇرىك، يسلام ءدىنىنىڭ ۋاعىزداۋشىسى فەتحۋللاح گيۋلەن انكارانىڭ ونى ەلگە ەكستراديتسيالاۋ تۋرالى ءوتىنىشى قاناعاتتاندىرىلسا، قارسىلىقسىز وتانىنا ورالاتىنىن جەتكىزدى. بۇل تۋرالى ول  Reuters اگەنتتىگىنە بەرگەن سۇحباتىندا مالىمدەدى.

وسىلاي فەتحۋللاح گيۋلەن تۇركيا باسشىلىعىنىڭ ونى ەكستراديتسيادان باس ساۋعالاپ، كاناداعا قاشۋى مۇمكىن دەگەن مالىمدەمەسىن جوققا شىعاردى. دەگەنمەن ول اقش ۇكىمەتىنىڭ تۇركيانىڭ سۇراۋىنا وڭ جاۋاپ قايتارمايتىنىنان ءۇمىتتى ەكەنىن جاسىرمادى.

وسىدان بۇرىن تۇركيا پرەزيدەنتى رەدجەپ تايىپ ەردوعان اقش پرەزيدەنتى دونالد ترامپتان فەتحۋللاح گيۋلەندى ءوز مەملەكەتىنە ەكستراديتسيالاۋ تۋرالى سۇراعانىمەن، امەريكانىڭ ادىلەت مينيسترلىگى وسى ىسكە قاتىستى جەتكىلىكتى دالەلدەر كەلتىرمەگەنى سەبەپتى، بۇل ءوتىنىشتى قاناعاتتاندىرۋ ورىنسىز دەپ وتىر.

ەستەرىڭىزگە سالا كەتەيىك، 2017 جىلدىڭ مامىر ايىندا تۇركيا فەتحۋللاح گيۋلەندى وتكەن جىلدىڭ 15 شىلدەسىندە ورىن العان مەملەكەتتىك توڭكەرىس ءۇشىن جاسالعان تالپىنىستىڭ ۇيىمداستىرۋشىسى دەپ كىنالاعان ەدى.

“The Qazaq Times”