پۋتين رەسەيلىك حاكەرلەردى «پاتريوت» دەپ اقتادى

سانكت-پەتەربۋرگتەگى  ينۆەستيتسيالىق كونفەرەنتسياعا قاتىسقان رەسەي پرەزيدەنتى ۆلاديمير پۋتين حالىقارالىق مەدياعا بەرگەن جاۋابىندا، رەسەي مەن اقش جانە وزگە ەلدەر اراسىنداعى شيەلەنىستىڭ سەبەبىنەن جەلىلىك شابۋىلدار كۇشەيىپ وتىرعانىن ايتتى. سونىڭ اراسىندا رەسەيدىڭ پاتريوت حاكەرلەرىنىڭ دە تۇرعانىن ايتا كەلىپ، جەلىلىك شابۋىلدار جاسادى دەگەن كوپتەگەن ايتىلىمداردىڭ ءبارى دە رەسەيگە جابىلعان جالالار ەكەنىن ايتتى. بۇل تۋرالى “The Wall Street Journal” باسىلىمى حابارلاپ وتىر.

پۋتين رەسەيلىك حاكەرلەردى پاتريوتتىق سەزىممەن جەلىلىك شابۋىلدارعا تويتارىس بەرىپ وتىر دەپ اقتادى. ولار رەسەيگە جازىقسىز جازا جاپقاننان كەيىن زاڭدى تۇردە جاۋاپ بەردى دەدى. بىراق، بۇل "وتانسۇيگىش حاكەرلەردى" كرەمل تاراپى ۇكىمەتتىك دەڭگەيدە جەلىلىك شابۋىلعا ۇيىمداستىرعان جوق دەدى. كونفەرەنتسياداعى شەتەل جۋرناليستەرى رەسەيىڭ «پاتريوت حاكەرلەرى» الداعى ۋاقىتتا گەرمانيادا وتەتىن سايلاۋعا ارالاسۋى مۇمكىن بە دەگەن سۇراق قويدى. پۋتين: «كيبەر شابۋىلشىلار كەز-كەلگەن تەحنولوگيالاردىڭ كومەگىنە سۇيەنۋى مۇمكىن. بىراق ءبىز ۇكىمەت تاراپىنان ونداي نۇسقاۋلار مەن قولداۋلار بىلدىرمەيمىز»، – دەدى.

اقش قورعانىس دەپارتامەنتى وسىعان دەيىن رەسەيدىڭ كيبەر شابۋىلشىلارى 2016 جىلعى اقش پرەزيدەنت سايلاۋىنا كەدەرگى كەلتىردى دەپ كەلدى. الايدا، كرەمل تارابى بۇل ايتىلعانداردى جوققا شىعارىپ كەلەدى. ال، اقش قورعانىس دەپارتامەنتى مەن فەدەرالدىق جانە ورتالىق بارلاۋ باسقارماسى رەسەيدىڭ سايلاۋعا ارالاسقانى تۋرالى تەكسەرۋدى باستاپ كەتتى.

بۇل ماسەلە ترامپ تاققا شىققاننان كەيىن دە ەكى ەل اراسىنداعى قارىم-قاتىناستىڭ سالقىندىعىنا سەبەپ بولىپ كەلەدى.

“The Qazaq Times”