فوتو: Android Authority

Nokia 3310 تەلەفونى قايتادان وندىرىلە باستادى دەپ حابارلايدى ۆۆس اقپاراتتار قىزمەتى.

Nokia 3310 ۇيالى تەلەفوندارى 2005 جىلى وندىرىستەن الىنىپ تاستالعانى بەلگىلى. بىراق، سول ۋاقىتقا دەيىن Nokia 3310 تەلەفونىنىڭ 126 ميلليون داناسى الەم بويىنشا ساتىلىپ ۇلگەرگەن بولاتىن. اتالمىش رەكوردتىق كورسەتكىشتى قايتالاماسا دا، قوماقتى قارجى تابۋ ماقساتىندا اراعا 12 جىل سالىپ Nokia 3310 تەلەفونىنىڭ جاڭارتىلعان نۇسقاسىن HMD Global كومپانياسى وندىرىسكە قايتا جىبەرگەن.

قازىرگى تاڭدا  Nokia كومپانياسىنىڭ تەلەفون وندىرمەيتىندىگىنە بايلانىستى HMD Global كومپانياسى Nokia برەندىن ساتىپ العان.

HMD Global كومپانياسى Nokia تەلەفوندارىنىڭ 3310 مودەلىنەن باسقا، Nokia اتاۋىمەن ىشىنە Android باعدارلاماسى ورناتىلعان ءۇش بىردەي سمارتفونداردى دا شىعاراتىندارىن مالىمدەگەن.

وندىرۋشىلەردىڭ ايتۋىنشا Nokia 3310 قۋاتى ۇزدىكسىز پايدالاناتىن بولسا 22 ساعاتقا، ءجيى قولدانبايتىن بولسا ءبىر ايعا دەيىن جەتەدى ەكەن.

وسى اپتادا ۇلىبريتانيادا Nokia 3310 تەلەفونىنىڭ جاڭارتىلعان نۇسقاسى 49,99 فۋنتقا ساتىلىمعا شىعارىلعان. ۇلىبريتانيا ساراپشىلارىنىڭ زەرتتەۋى بويىنشا Nokia تەلەفوندارىنىڭ بۇل نۇسقاسىنا سۇرانىس كوپ بولۋى ءتيىس. ويتكەنى قازىرگى تاڭدا ەلدە قولدانىستا 20 ميلليون تەلەفون بولسا، سونىڭ 1 ميلليونى كنوپكالى تەلەفوندار ەكەن.

“The Qazaq Times”