يران پرەزيدەنت سايلاۋىندا تىڭ وزگەرىس: ۆيتسە-پرەزيدەنت سايلاۋدان باس تارتتى

يران يسلام رەسپۋبليكاسىنىڭ 12-ءشى كەزەكتى پرەزيدەنت سايلاۋى وتۋگە جاقىن قالدى. 16 مامىر كۇنى يراننىڭ قازىرگى ءبىرىنشى ۆيتسە-پرەزيدەنتى ءوزىنىڭ پرەزيدەنت سايلاۋىنداعى كانديداتۋراسىنان باس تارتاتىندىعىن جاريالادى. بۇل تۋرالى «شينحۋا» اقپاراتتىق اگەنتتىگىنىڭ تەحرانداعى تىلشىلەرى حابارلاپ وتىر.

يران يسلام رەسپۋبليكاسىنىڭ اقپاراتتىق اگەنتتىگىنىڭ حابارىنا سايكەس، قازىرگى ۆيتسە-پرەزيدەنتى يسحاق جاھانگيري پرەزيدەنتتىك سايلاۋدان شەگىنىپ شىعاتىنىن جاريالاعان. ول بۇل ارەكەتىن قازىرگى پرەزيدەنت روۋحانيگە قولداۋ ءبىلدىرۋ ءۇشىن دەپ تۇسىندىرگەن. ول سوزىندە: «ۇلتتىق پروگرەسس يراننىڭ نۇرلى بولاشاعىنىڭ العىشارتى. سوندىقتان مەن سايلاۋدا پرەزيدەنت روۋحانيگە داۋىس بەرۋلەرىڭىزدى سۇرايمىن»، – دەدى.

ەكى كۇننەن كەيىن يراننىڭ 12-ءشى كەزەكتى پرەزيدەنت سايلاۋى وتەدى.  ەلدىڭ ىشكى ىستەر مينيسترلىگى 20 ساۋىردە جاريالاعان حابارىندا، پرەزيدەنت روۋحانيدى قامتىعان 6 ۇمىتكەردىڭ كونستيتۋتسيالىق جوعارى كەڭەستىڭ ساراپتاۋىنان وتكەندىگى ايتىلعان. 15 مامىر كۇنى تەحران قالا باستىعى، 16 كۇنى قازىرگى ۆيتسە-پرەزيدەنت پرەزيدەنتتىك سايلاۋدان شەگىنىپ شىقتى. ال قازىر ۇمىتكەر  كانديداتتار سانى پرەزيدەنت ءروۋحانيدى قوسقاندا 4 ادام.

يراندا ءار ءتورت جىلدا ءبىر رەت پرەزيدەنت سايلاۋى وتەدى. سايلاۋشىلار ءوز كانديداتىنا تىكەلەي داۋىس بەرە الادى. ءبىر تۇلعا قاتارىنان ەكى كەزەك پرەزيدەنت بولۋىنا مۇمكىندىگى بار.

“The Qazaq Times”